Сэтинньи 30 күнүгэр Мэҥэ-Хаҥалас улууһугар Ороссолуода орто оскуолатын баазатыгар Илин эҥэр улуустар агро хайысхалаах оскуолалар дириэктэрдэрэ кыттыылаах “Агропрофилированнай үөрэхтээһин билиҥҥи туруга уонна инники кэскилэ” диэн тиэмэҕэ төгүрүк остуолга кыттыыны ыллылар. Сүбэ-мунньаҕы СР “Ил Түмэн” государственнай мунньаҕын наукаҕа, үөрэҕириигэ, култуураҕа, маассабай информация тиһиктэригэр уонна общественнай тэрилтэлэр дьыалаларыгар бастайааннай кэмитиэт бэрэссэдээтэлэ Феодосия Габышева салайан ыытта.

Быйыл Саха сиригэр агрооскуолалар тэриллэн үлэлээбиттэрэ 30 сыллара. Дойду үрдүнэн сайдыы саҥа кэрдиис кэмигэр Саха Республикатыгар стратегия 2032 сылга диэри ылыллар кэмигэр, СР Ил Дархана Айсен Николаев уурааҕынан үөрэхтээһин сайдыытын кэскиллэрин туһунан тустаах докумуоннарга олоҕуран, тыа сирин оскуолаларын ол иһигэр агро хайысхалаах оскуолалар инники дьылҕалара үгүстэри долгутар. Мэҥэ-Хаҥалас улууһугар уопсайа 7 агрооскуола үлэлиир эбит буоллаҕына, Ороссолуода агро оскуолата материальнай-техническэй баазатынан, сирэ-уота табыгастааҕынан, оҕуруот аһын үүннэрэн, көрөн-харайан, нэһилиэнньэни, улууһу хааччыйар биир бастыҥ көрдөрүүлээх оскуола буолан бу хайысханан үлэлээбитэ номнуо 20 сыла буолар. Төгүрүк осуол кыттыылаахтара сокуоннар тула, нормативнай-правовой бааза, оҕону үөрэтии-иитии ис хоһоонун өртүнэн, ханнык компетенция баар буолуохтааҕый, ханнык идэҕэ оҕолору туһаайан үөрэтиэхтээхпитий, инникитин туох-ханнык соруктар туралларын дьүүллэстилэр. Бородууксуйаны батарыыттан саҕалаан, үөрэтии ис хоһоонугар, саҥа кэнсиэпсийэни оҥорууга, научнай-методическэй хааччыйыыга туох үлэлэр баралларын ырыттылар. Агрооскуолалар атын салаалары кытары, тыа хаһаайыстыбатын, предпринимательство, үөрэҕирии, наука министиэристибэлэрин, бөдөҥ хампаанньалары, тэрилтэлэри кытары хайдах дьүөрэлэһэн үлэлээн, сөптөөх быһаарыыны ылынан, инники сайдыыга баралларыгар киэҥ кэпсэтии таҕыста.

Зоя Герасимова.