Олунньу 26 күнүгэр Саха Республикатыгар физкультурнай хамсааһын төрүттэммитэ 100 сыллаах үбүлүөйдээх күнүн көрсө М.П. Габышев аатынан Балыктаах орто оскуолатын  физкультураҕа учуутала, Саха Өрөспүүбүлүкэтин үөрэҕириитин туйгуна, Саха Өрөспүүбүлүкэтин физическэй култууратын уонна успуордун туйгуна, мас тардыһыытыгар Саха Өрөспүүбүлүкэтин успуордун маастара Андрей Николаевич Винокуров “Саха норуотун төрүт дьарыга, хамсаныыта уонна өбүгэ оонньуулара оҕо эт-хаан өттүнэн сайдыытыгар сабыдыаллара” диэн айар лабораторията үрдүк таһымҥа ыытыланна.

Биир идэлээх коллегаларын, наставниктарын, аҕа табаарыстарын айымньылаах үлэтин билсиһэ улууспут 9 оскуолатыттан 17 физкультура учууталлара кэлэн кыттыыны ыллылар. Бу тэрээһиҥҥэ Андрей Николаевич үөрэнээччилэрэ, дьарыктаабыт оҕолоро бэйэтин “туйаҕын хатаран” физкультура учуутала буолан, үөрэммит оскуолаларыгар үлэлии кэлбит үөрэнээччилэрэ Павел Кычкин, Александра Семенова күүс-көмө буоллулар.

Айар лаборатория сарсыардаттан аһаҕас уруоктартан саҕаланна. Андрей Николаевич 4 кылаас үөрэнээччилэригэр физкультура уруогун биир сүрүн көрүҥэр “Чэпчэки атлетика” түһүмэҕиттэн “Сүүрүү – спорт королевата” диэн уруогу ыытта. Иккис уруок 9 кылаас үөрэнээччилэригэр “Тыа сирин киһитин түбүктээх үлэтэ - хамсаныы төрдө” диэн уруогу үөрэнээччитэ, билигин коллегата Семенова Александра Алексеевналыын биир сүбэнэн ыыттылар.

Айар үлэ семинарын арыйыы үөрүүлээх чааһыгар “Мэҥэ нэһилиэгэ” муниципальнай тэриллии баһылыга Александр Куприянов, үөрэх управлениетын методиһа Нестеров Михаил Павлович Андрей Николаевичка эҕэрдэ тылларын анаатылар, улуустааҕы үөрэх үлэһиттэрин профкомун Махтал суругун, анал бэлиэтин туттарда, бүгүҥҥү семинар кыттыылаахтарыгар ситиһиини баҕардылар.

Салгыы учуутал киэн туттар үөрэнээччитэ, Саха Республикатын спордун маастара, “Азия оҕолоро” Аан дойдутааҕы ооннььуулар чемпиона, Россия призера Павел Кычкин уруогу таһынан дьарыкка оҕолору мас тардыһыытыгар дьарыктыыр албастарын тренеринээн Андрей Николаевичтыын кэлбит коллегаларыгар көрдөрдүлэр.

Авторскай семинары көрө-истэ кэлбит учууталлар “Боотурдар оонньуулара” диэн эргиччи системанан ыытыллар саха төрүт оонньууларын көрүҥнэригэр илин-кэлин түсүһэн күрэхтэһэн ыллылар, бастыҥнары быһаардылар. Айар лаборатория “Физкультура учууталын мэтириэтэ” диэн төгүрүк остуол тула олорон Андрей Николаевич 34 сыл устата физкультура учууталынан үлэлээн мунньубут уопутун кэпсээтэ. Эдэр коллегаларыгар баҕа санаатын тиэрдэн, олус туһалаах сэһэргэһиини тэрийдэ. Андрей Николаевич айымньылаах үлэтин, дьарыгын көрдөрөр быыстапканы сэргии көрдүлэр, санаа атастаһан, ирэ-хоро кэпсэтэн астынан тарҕастылар.

Балыктаах орто оскуолатын пресс-киинэ