Быйыл ааспыт 20-с үйэ иккис аҥарыгар уонунан сыллар усталарыгар Мэҥэ Хаҥалас улууһун социально-экономическай сайдыытыгар уонна олохтоох нэһилиэнньэ олоҕун тупсуутугар сүдү кылаатын киллэрбит оройуон бөдөҥ тэрилтэтэ - Мэҥэ Хаҥаластааҕы промкомбинат тэриллибитэ 85 сыла буолла.

Алтынньы 7 күнүгэр Улуустааҕы үөрэтэр-оҥорон таһаарар киин кэлэктиибин уонна Р.Г. Васильев аатынан Мэҥэ Хаҥаластааҕы кыраайы үөрэтэр түмэл көҕүлээһиннэринэн “Аҕа көлүөнэ үтүө үгэстэрин тутуһан үлэни өрө тутуоххайын, улууспут сайдыытын түстүөҕүҥ” Мэҥэ Хаҥаластааҕы промкомбинат тэриллибитэ 85 сылыгар ананар улуустааҕы быыстапка үөрүүлээх аһыллыыта буолла. Үөрүүлээх тэрээһиҥҥэ Мэҥэ Хаҥаластааҕы промкомбинат бэтэрээннэрэ, Улуустааҕы үөрэтэр-оҥорон таһаарар киин үлэһиттэрэ уонна Майа сэлиэнньэтин олохтоохторо кыттыыны ыллыллар. Үлэ тэрилтэтин дириҥ ис хоһоонноох устуоруйатын арыйар быыстапка аһыллыытыгар Игнатьев Д.Г., Майа администрациятын баһылыгын солбуйааччыта, Стручков Ф.А., улуустааҕы үөрэҕирии управлениятын начальнигын солбуйааччыта, Васильева В.Н., үөрэтэр-оҥорон таһаарар киин аатыттан үлэ бэтэрээннэрин, кэлбит ыалдьыттары эҕэрдэлээтилэр. Тэрээһин үөрүүлээх чааһыгар промкомбинакка араас сылларга үлэлээбит бэтэрээннэр ааспыт сыллары ахтан санаан аастылар, үүнэр көлүөнэҕэ кэскил тылларын анаатылар.

Сэбиэскэй кэмтэн саҕалаан күн-бүгүнүгэр диэри өрөспүүбүлүкэ, улуус сайдыытыгар уонна дьон-сэргэ туһугар үлэлээн олохторун анаабыт Промкомбинат тэрилтэтин туруу үлэһит дьоннорун ааттара үйэтитиллэ турдун. Тыа сиригэр олохтоох промышленность таһаарыылаах үлэтин устуоруйата, промкомбинат хоһуун үлэһит дьоннорун төрөөбүт дойдуларыгар күүстээх бэриниилэрэ, ыарахаттартан чаҕыйбат хорсун быһыылара, оҥорон таһаарар сатабыллара, үлэҕэ уонна олоххо тапталлара, сарсыҥҥы күҥҥэ эрэллэрэ үүнэр көлүөнэҕэ холобур буолуоҕа, эдэр ыччат ытык көлүөнэ дьоннорунан киэн туттуохтара диэн эрэнэбит.