2019 с. муус устар 5 күнүгэр Нөөрүктээйи нэһилиэгин Павловскай орто оскуолатыгар Илин эҥэр улуустар төрөппүттэригэр аналлаах III пуорум буолан ааста.
Пуорум "Ыал-олох уйата", "Түмсүү- төлкө төрдө"- диэн Мандар Уус тылларын девиз оҥостон, төрөөбүт төрүт тылга, норуот үгэстэригэр, итэҕэлгэ олоҕуран билиҥҥи кэмҥэ уолу уоллуу, кыыһы кыыстыы иитиигэ сөптөөх суоллары көрдөөһүҥҥэ, хайысхалааһыҥҥа ыал үөрэҕин тула түмсэр сыаллаах- соруктаах ыытылынна.
Тэрээһиҥҥэ уопсайа 211 төрөппүт Амма, Таатта, Чурапчы, Мэнэ-Ханалас улуустарыттан кэлэн оҕо иитиитигэр бүгүҥҥү күҥҥэ сытыытык турар боппуруостары дьүүллэстилэр, уйулҕа үөрэхтээхтэриттэн, ыал хараанньыттарыттан, иитэр үлэҕэ улахан уопуттаах идэтийбит дьонтон боппуруостары биэрэн эппиэттэри ыллылар. Ол курдук бочуоттаах ыалдьыт быһыытынан кыттыыны ыллылар: Аргунова Любовь Семеновна, Ыал култууратын киинин салайааччыта, дьиэ-кэргэн педагога, Михайлов Виктор Данилович филосов н.д., М.К.Аммосов аатынан ХИФУ профессора, Ыал култууратын киинин попечителэ, Петрова Маргарита Константиновна, норуот педагогикатын ассоциациятын бырабылыанньатын чилиэнэ, Россия ийэлэрин хамсааьын чилиэнэ, Ильина Татьяна Михайловна, "Эркээйи" барыл тустээччитэ, Сивцева Изабелла Александровна, Таатта МО баһылыгын солбуйааччы, Кондаков Иван Иванович, норуот педагогикатын ассоциациятын бырабылыанньатын чилиэнэ, Сабарайкина Татьяна Васильевна, уйулҕа үөрэхтээҕэ, Иванов Семен Викторович, Бүлүүтээҕи педагогическэй колледж директора, Россиятааҕы национальнай төрөппүт ассоциациятын Саха сиринээҕи салаатын салайааччыта, Иванова Айталина Петровна, норуот педагогикатын ассоциациятын эппиэттээх сэкэрэтээрэ. Ону сэргэ Анатолий, Светлана Бурнашевтар эр дьоҥҥо уонна дьахталларга туспа былаһааккалары тэрийэн ийэ уонна аҕа оруола оҕо иитиитигэр оруолларыгар бэйэлэрин санааларын, опыттарын атастаспыттара дьон болҕомтотун тарта, элбэх саҥа санаалары, көрүүлэри киллэрдэ. Пуорум түмүгүнэн төрөппүттэр киэҥ ис хоһоонноох ыҥырыы ылыннылар.
"Ыал - олох уйата"
Илин эҥэр улуустарын төрөппүттэрин III пуорумун ыҥырыы суруга
Кыттааччылара: Эдэр ыаллар, үөрэнэр оҕолордоох төрөппүттэр, төрөппүттэр - төрөппүттэрэ, ыал хараанньыттара, норуот педагогикатын кэрэһиттэрэ, олоҥхоҕо ыал олоҕун кэрэһиттэрэ, оскуола иннинээҕи саастаах оҕо уһуйаанын иитээччилэрэ, оскуола үлэһиттэрэ, ыалы кытта үлэни тэрийэр көдьүүстээх бырайыактар ааптардара, нэһилиэк аҕа баһылыктара, салайааччылар.
Пуорум туруорбут сыалын-соругун толору сиппитинэн ааҕабыт уонна кэпсэтии, санаа атастаһыы түһүлгэлэригэр дьүүллэһэн, ырытыһан баран уопсай биир санааҕа кэлэн Илин эҥэр улуустарын, төрөппүттэрин ыҥырабыт:
Төрөппүккэ, дьиэ- кэргэҥҥэ:
- Дьиэ кэргэҥҥэ оҕо сахалыы саҥарар эйгэтин тэрийиини көҕүлүүргэ.
- Оҕону төрүөҕүттэн саха төрүт сатабылларыгар уһуйууну олохсутуу .
- Саха чулуу үгэһин - уруурҕаһыыны- аймахтаһыыны өрө тутан, үтүө үгэс оҥосторго.
Муниципальнай тэриллиилэргэ:
- Улуус нэһилиэктэригэр ыал сайдыытыгар көдьүүстээх бырайыактары тэрийии.
- Улуус общественнай түмсүүлэрин биир ситимҥэ үлэлииллэрин көҕүлээһин.
- Өбүгэ оонньуутун эт- хаан сайдыытыгар туһаайыы.
Улуустааҕы үөрэҕирии, культура эйгэтигэр:
- Төрөппүт иитэр культуратын үрдэтиигэ үлэни утумнаахтык ыытыы.
- Уйулҕа үөрэҕин суолталааһын, төрөппүккэ көдьүүһүн өйдөтүү.
- Ыал үөрэҕэр аныгы технологиялары туһаныыны сүрүннээһин.
|