Кулун тутар ый 24 күнүгэр Ф.Г. Охлопков аатынан Майа орто оскуолатыгар үгэскэ кубулуйбут улуустааҕы “Мэҥэ Куо-2018”, “Мэҥэ Уолан-2018” күрэх буолан ааста. Быйылгы күрэххэ улууспут 6 муниципальнай тэриллии холбоһугуттан 6 кыыс, 4 уол оҕо кэлэн күрэс былдьаста, күөн көрүстэ.
Күрэх уопсайа 5 түһүмэҕинэн барда. Ол курдук күн бастакы аҥарыгар биһиги оҕолорбут “Саха төрүт оонньуутун” көҕүлүттэн туттулар, уолаттар эр киһи быһыытынан сатабылларын көрдөрөн ас быһар дуоска оҥорон таһаардылар, кыргыттар сатабаллаах хаһаайка буолалларын туоһутунан сандалы остуолу тэрийдилэр.
Күн иккис аҥарыгар кыттааччыларбыт таҥара табатын курдук таҥнан, сир симэҕэ курдук симэнэн бэйэлэрин билиһиннэрэн, талба талааннарын, дьоҕурдарын арыйан, булугас өйдөрүн, аһаҕастык санааларын этэллэрин истэн, көрөн дуоһуйдубут.
Түмүккэ быйылгы күрэх муҥутуур кыайыылаахтарынан “Мэҥэ Куо-2018” Федорова Күннэй (Ф.Г. Охлопков аатынан Майа орто оскуолата), “Мэҥэ Уолан- 2018” Неустроев Алеша (Балыктаах орто оскуолата) ааттаннылар. Кыайыылаахтар Республикатааҕы Ил дархан өйөбүллээх “Дьулуур” оҕо биир сомоҕо хамсааһына туруорбут Владивосток куорат “Океан” лааҕырыгар барар путевка тутан үөрүүлэрэ үс бүк үрдээтэ. Маны таһынан кыттааччыларга анал ааттар иҥэрилиннилэр: “Талба Талаан” Евсеева Аня (Хорообут орто оскуолата), “Мичийээнэ Куо” Габышева Леонида (Матта орто сокуолата), “Сулусчаана Куо” Петрова Дарина (Дьабыл орто оскуолата), “Нарыйаана Куо” Костромыкина Кристина (Хаптаҕай орто оскуолата), “Тускулаана Куо” Гаврильева Василина, “Саргылаана Куо” Федорова Күннэй (Ф.Г.Охлопков аатынан Майа орто оскуолата), “Үрүҥ Уолан” Петров Айысхаан (Төҥүлү орто оскуолата), “Кэскиллээх Уолан” Захаров Арсений (Мэлдьэхси орто оскуолата) “Өркөн Өй” Неустроев Алеша (Балыктаах орто оскуолата), “Эрчимнээх Уолан” Романов Артем (В.П. Ларионов аатынан Майа орто оскуолата).
![](/vesti/2017_2018/sdod/mehnehkuouolan1.jpeg)
![](/vesti/2017_2018/sdod/mehnehkuouolan2.jpeg)
![](/vesti/2017_2018/sdod/mehnehkuouolan3.jpeg)
![](/vesti/2017_2018/sdod/mehnehkuouolan4.jpeg)
![](/vesti/2017_2018/sdod/mehnehkuouolan5.jpeg)
![](/vesti/2017_2018/sdod/mehnehkuouolan6.jpeg)
![](/vesti/2017_2018/sdod/mehnehkuouolan7.jpeg) |