Кулун тутар 24 күнүгэр Мэҥэ-Хаҥалас Төҥүлү орто оскуолатыгар улуустааҕы «Кыыс оҕо-кэскиллээх омук эрэлэ» өбүгэ үөрэхтэригэр күрэх буолан ааста. Күрэх оскуола иһинэн ыытыллар «Сатабыллаах хаһаайка» проект биэс сыллаах үбүлүөйүгэр ананна. Күрэх сыала үрдүк культуралаах, сайдыылаах, инникитигэр сыаллаах-соруктаах, дойдутун историятын билэр, кыыс оҕону сахалыы тыыҥҥа иитии, дьиэҕэ-уокка сыһыаннаах үгэстэри үөрэтии, сайыннарыы. Күрэххэ 5 кыыстаах Павловскай, Хорообут, Балыктаах, Майатааҕы лицей, Төҥүлү оскуолаларын хамаандалара кыттан, үс үөрэххэ үстүү түһүмэҕинэн күрэхтэстилэр. Бастакы үөрэх «Сандалы остуолун тэрийии»: «Алаадьы буһарыы», «Күөрчэх ытыйыы»,  «Салаат оҥоруу».  Иккис үөрэх «Талба талаан түһүлгэтэ»:  «Иис-айымньы» - кыргыттар бэриллибит нэмиэтинэн прихватка быһан тиктилэр,  «Кумаа5ы тойуга» - тематын миэстэтигэр талан ылан, панно оҥордулар, «Талаан тарбах»- хаартыска арааматын киэргэттилэр. «Кыыс оҕо кэрэтэ…» үөрэххэ «Саха кыыһын барҕа баайа-бастыҥ-мааны майгыта» диэн темаҕа кыттааччылар боппуруостарга эппиэттээтилэр, «Сүүтүк сүбэлэргэ» кыыс оҕоҕо туһалаах сүбэлэри кэпсээтилэр.

Уопсай күрэх түмүгүнэн кыайыылаахтарга анал ааттар, сыаналаах бириистэр туттарылыннылар. Хамаанданан түмүккэ Төҥүлү 1 миэстэ, Балыктаах 2 миэстэ, Павловскай 3 миэстэ.