Уһуйааччы уонна педагог сылыгар анаммыт улуустааҕы “Идэ ситимэ” күрэх балаҕан ыйын 28 күнүгэр Майатааҕы “Сардаана” оҕону сайыннарар кииҥҥэ ыытылынна.

Дьүүллүүр сүбэҕэ наставник, “Сардаана” оҕону сайыннарар киин ветеран педагога Слепцова Инна Ивановна, уһуйаан директора Захарова Альбина Романовна, Аллараа Бэстээх “Сказка” уһуйаан эдэр педагога Винокурова Наталья Вячеславовна, улуус үөрэҕин салалататын информационно-методическай отдел гл. специалиһа Ларионова Мария Николаевна үлэлээтилэр.

Барыта 6 түһүмэххэ, кустовой методическай холбоһуктартан 7 хамаанда кыттыыны ылла. Күрэххэ уһуйааччы уонна эдэр педагог аныгы кэм иитээччитин сүрүн сатабылларын, үөрэх уобаластарынан методиканы билии, кылгас бэриллибит кэмҥэ бырайыак суруйуу уонна да атын тургутуулары аастылар. Түмүккэ араас кэм үөрэхтээһиҥҥэ туруорар ирдэбиллэрин тула аһаҕас кэпсэтии буолла.

“Идэ ситимэ” күрэххэ кэлбит хамандалар бары араас анал аат хаһаайыннарынан буоллулар, ол курдук:

• С.Н. Михайлов аат. Чыамайыкы орто оскуолата – “Наставническай үлэ бастыҥнара”
• А.С. Захарова аат. Хаптаҕайдааҕы “Хомусчаан” оҕону сайыннарар киин – “Айымньылаах дьүөрэлэһии”
• А.В. Чугунов аат. Мэлдьэхси орто оскуолата – “Саҥаны саҕааччылар”
• Маттатааҕы “Ньургуһун” оҕо уһуйаана – “Уларыйыы үтүө сирдьиттэрэ”, ”Көрөөччү биһирэбилэ” (онлайн куоластааһын түмүгүнэн)
• Табаҕатааҕы “Кэскил” оҕо уһуйаана - “Идэҕэ бэриниилээх”
• Харатааҕы “Кэрэчээн” оҕо уһуйаана – “Үгэс уонна аныгылыы көрүү”

Муҥутуур кыайыылааҕынан Майатааҕы “Чуораанчык” уһуйаан хамаандата таҕыста. Айымньылаах үлэ биир үтүө түмүгэ көстөр күрэҕин тэрийбит Майатааҕы “Сардаана” оҕону сайыннарар киин салайааччытыгар Захарова А.Р., старшай иитээччигэ Романова Т.И., педагог-психологка Шестакова Т.А., уонна уһуйаан бары үлэһиттэригэр махтанабыт.

Ларионова М.Н., ИМО гл. специалиһа

#ГПН_2023 #ГодПедагогаНаставника