Муус устар ый 7 күнүгэр Мэҥэ-Хаҥалас улууһун үөрэҕириитин ситимигэр Оҕо көҕүлээһинин сылынан, Республикабытыгар Уол оҕо күнүнэн, ону тэҥэ Булчут күнүнэн, Тумул нэһилиэгэр улуустааҕы «Өбүгэ булдун үгэстэрэ» күрэх ыытылынна. Бу күрэх уол оҕону төрүт үгэстэрбитигэр, булчут барахсан сорсуннаах суолугар, дьоһуннаах кутаатыгар умсугутар сыаллаах патриотическай иитиигэ олоҕурар. «Уол оҕо-эр киһи диэн проект» иһинэн ыытылынна. Күрэх балаһыанньата бэйэтэ саҥалыы (инновационнай) көрүҥнэрдээх, улууспутугар бастакытынынан буолла. Күрэх балаһыанньатыттан билиһиннэрдэххэ манныктар:
- хандаа, сохсо иитиилээх, үҥүү быраҕыылаах, туут хайыһардаах эстафета;
- хамаанданан ойбон алларыы (8-10), ол кэмҥэ 6, 7 кылаас уолаттара кыыллар суолларын, бултуур тэриллэри таайаллар;
- хамаанданан кутаа уотугар чэй оргутуу;
- куйуурдааһын бириэмэҕэ;
- Ойбон алларыыга, сохсо иитиигэ абсолютнай күрэх.
Тэрээһин арыллыыта сахалыы сиэри- туому тутуһан, А.А. Скрябин алгыһынан, арыылаах алаадьынан айах тутууттан саҕаланна. Аһаҕас айылҕаҕа, сааскы салгыҥҥа ыытыллан киһи эрэ сынньанар, үөрэр- көтөр усулуобуйата тэрилиннэ. Олохтоох оскуола повардара ыалдьыттары оллоон чэйинэн, миининэн, сылаас бэрэскилэринэн күндүлээтилэр.
Уопсайа 8 хамаанда кыттыыны ыллылар, ол курдук: Матта, Ороссолуода, Дьабыыл, Төҥүлү, Балыктаах, Бэдьимэ, Тумул №1, Тумул №2 орто оскуолаларын хамаандалара күөн көрүстүлэр, күрэхтэһии тыҥааһыннаахтык барда. Тэрээһиммитигэр улуус предпринимательствоҕа уонна аччыгый бизнеска управлениетын салайааччыта Е.Е. Белолюбский, үөрэх салалтатын иитэр отделын сүрүннүүр специалиһа Н.М. Семенов кэлэн ыалдьыттаан, тыл этэн, тэҥҥэ үөрэн-көтөн, айылҕалыын алтыһан күрэх таһымын үрдэттилэр. Уопсай түмүккэ кыайыылааҕынан буоллулар: Тумул №1- 1 миэстэ, Бэдьимэ орто оскуолата- 2 миэстэ, Тумул №2- 3 миэстэҕэ тахсан үөрдүлэр- көттүлэр. Кыайыылаах хамаандалар мэтээллэринэн, бириистэринэн көһө сылдьар кубогынан наҕараадаланнылар. Ону тэҥэ көрүҥнэргэ кыайбыт хамаандалар эмиэ бириис тутан үөрүүлэрэ үксээтэ. Эстафета этабыгар олохтоох Тумул 2 хамаандата тэҥнээхтэрин булбатылар, ойбон алларыы түһүмэҕэр Төҥүлү орто оскуолатын уолаттара кыайдылар, кыыл суолун, булт тэрилин таайыыга Тумул орто оскуолатын кэскиллээх булчуттара кыайдылар, чэй өрүү түһүмэҕэр Ороссолуода хамаандата сатабыллааҕын көрдөрөн кыайыыны ыллылар, саамай байанайдаах Куйуурдааһын түһүмэҕэр Бэьимэ бэртэрэ баартаахтарын биллэрэн кыайыыны суруннулар. Ону тэҥэ «Кылаан анньыыһыт» Төҥүлү орто оскуолатыттан Ганя Колосов ылыан ылла.
Бириистэри туруордулар: Үөрэх салалтата (сал. Черкашина И.В.), улуус аҕа сүбэтэ (сал. Белолюбский Е.Е.), улуустааҕы ыччат управлениета (Сал.Захаров К.А.), Өбүгэ оонньууларын улуустааҕы федерацията (сал. Тихонов Д.И.), нэһилиэк бары тэрилтэлэрэ, нэһилиэк «Дабаан» эдэр ыччат түмсүүтэ (сал. Татаринов Х.А.), кырдьаҕастар сэбиэттэрэ (сал. Слепцов Д.Д.), олохтоох булчуттар (Птицын И.С), олохтоох спортсменнар (Попов К.Н.), олохтоох оскуола коллектива (директор Иванова М.В.), чааһынай предприниматель Дагданча Т.Г.
|