Мэҥэ-Хаҥалас улууһугар иитии Концепциятын оҥоруу үлэтэ балаҕан ыйын 29 күнүгэр ыытыллыбыт Улуустааҕы төрөппүт форумунан ылыныллан ситимнээхтик ыытыллар.

Сэтинньи 15-16 күннэригэр улууска иитии Концепциятын оҥорууга толкуйу түмүү 3 түһүмэҕэр нэһилиэк баһылыктара, оскуола директордара, оҕо уһуйаанын сэбиэдиссэйдэрэ уонна үөрэх эйгэтин экспертнэй сүбэтэ кыттыылаах санаа атастаһыыта буолла.

31 нэһилиэк (Алтан, Бүтэйдээх, Доллу, Дьабыыл, Дьаҥхаады, Томтор, Ороссолуода, Моорук, Аллараа Бэстээх, Төҥүлү, Наахара, Тиэлиги, Нөөрүктээйи, Тараҕай, Хаптаҕай, Холгума, Чыамайыкы, 1 Тыыллыма, 2 Тыыллыма, Хара, Ходоро, Догдоҥо, Баатара, Бэдьимэ, Хорообут, Мэлдьэхси, Мэҥэ, Мөҥүрүөн, Араҥас, Дойду) уонна Майа сэлиэнньэтэ өй-санаа иитиллэр илгэлээх эйгэтин тэрийиигэ бүөм санааларын тиспит тосхоллорун сырдаттылар. Оҕону сахалыы сиэрдээх, үлэҕэ сатабыллаах буоларга иитии, төрөппүт иитэр культуратын үрдэтиигэ, оҕо тыа сирин үлэтигэр, дьиэ уот дьаһалыгар сыстаҕас буола улаатарыгар болҕомтону туһаайыы, кыыс уонна уол оҕону айылгыларынан иитиигэ болҕомто ууруу, үөрэҕи таһынан дьарыкка, сайыҥҥы сынньалаҥҥа тыа сирин дьарыгар уһуйуу, үлэҕэ тапталы иҥэрии, техническэй үөрэхтээһини сайыннарыы, ыал дьоллоох буолууларын эркээйилиир дьиэ кэргэн кииннэрин тэрийии уонна да атын бүгүҥҥү күҥҥэ сытыытык турар боппуруостар тула кэпсэтии таҕыста.

Нэһилиэктэр иитиигэ көрүүлэрин, этиилэрин, анаарбыт, торумнаабыт тосхоллорун ситимнээн улуус иитиигэ Концепцията ахсынньы ыйга таҥыллан бүтэн үлэни эркээйилиир докумуонунан буолуохтаах.