Ыам ыйын 30 күнүгэр Дьабыыл орто оскуолатын «Илгэ» үлэ уонна сынньалаҥ стационарнай лааҕырын базатыгар улуус агрооскуолаларыгар «Сайылыкка тахсыы» сиэрин–туомун толоруу улуустааҕы мероприятие буолан ааста. Кыттыыны ыллылар Балыктаах, Ороссолуода, Майа, Мэлдьэхси, Дьабыыл агрооскуолаларын учууталлара уонна үөрэнэээччилэрэ.
Үөрүүлээх чааһыгар сайылыкка тахсыы сиэрин – туомун толорон алгыс этилиннэ, түптэ буруота унаарда, агрооскуолалар эҕэрдэ нүөмэрдэринэн түмүктэннэ. Эбиэттэн киэһэ үөрэнээччилэргэ «Сатабыл» конкурса уонна учууталларга «Полоса препятствий» күрэхтэһиитэ буолбута. «Сатабыл» конкурска оҕолор сэппэрээтэр хомуйуутугар, балык хатырыктааһыныгар, өтүү быатын өрүүтүгэр, өбүгэ оонньууларыгар күрэхтэстилэр. Ол түмүгэр 1 миэстэни Ороссолуода, 2 миэстэни Мэлдьэхси, 3 миэстэни Балыктаах үөрэнээччилэрин хамаандалара ыллылар.
Улахан дьоннор күрэхтэһиилэригэр палатка туруоруутуттан саҕалаан канат, мышеловка курдук араас мэһэйдэри туорааннар 1 миэстэҕэ таҕыста Дьабыыл үлэһиттэрин хамаандата, 2 миэстэҕэ Мэлдьэхси хамаандата, 3 миэстэҕэ Майа хамаандата. Бары кыттыылаахтар мэтээлинэн уонна грамотанан наҕараадаламмыттара.
Бу күн оҕолорго араас оонньуулар, сынньалаҥнар ыытылыннылар. Сүрдээх тыҥааһыннаах, көрдөөх күн канат тардыһыытынан түмүктэннэ. Оҕолорго Майа хамаанадата бастаата, иккис Балыктаах, үһүс Ороссолуода хамаандалара тигистилэр. Улахан дьоҥҥо Дьабыыл хамаандата бастаата, иккис Майа, үһүс Мэлдьэхси хамаандата таҕыста. Түмүккэ үөрэн–көтөн, араас бириистэри тутан, махтал тыллаах бардылар.
|