Бэс ыйын 1 күнүгэр Мэңэ-Хаңалас улууһун кыраайы үөрэтэр музейыгар оҕо-аймах тоҕуоруһа муһунна.
Улууска үөрэҕирии 140 сылын көрсүһэ, 140 сыл устата Учуутал диэн үрдүк ааты сүкпүт үгүс көлүөнэ кэнчээрилэрин сырдыкка кынаттаабыт Аанньал тэңэ киһиэхэ учууталга махтанан улуус оскуолатын үөрэнээччилэрэ «Учууталбыт биһиэнэ» диэн өйтөн суруйуулара, ахтыылара, хоһоонноро, интервьюга холонуулара, дьүһүйүүлэрэ уо.д.а. «Сайдам» кинигэ кыһатыгар (редактор Лыткина М.П.) бэчээттэнэн күн сирин көрдө.
Музей дьиэҕэ кинигэ сүрэхтэниитигэр үөрэнээччилэр ыллаан, үңкүүлээн, фрукталаах фуршеттаах баай-байылыат остуолга бэйэ-бэйэлэрин билсистилэр. Бу кинигэҕэ уопсайа 114 оҕо үлэтэ киирбитэ кэрэхсэбиллээх. Кинигэни Саха Республикатын үөрэҕириитин туйгуна, Россия журналистарын сойууһун чилиэнэ Августина Семеновна Владимирова хомуйан оңордо.
Августина Семеновна айар оҕолору кытта ситимнээхтик үлэлэспитэ быйыл чоп курдук 30 сылын туолла.
Кинигэ сүрэхтэниитигэр мустубут үөрэнээччилэр, төрөппүттэр, үлэлэспит учууталлар истиң-иһирэх эҕэрдэҕэ кыттыһан үөрэн-көтөн тарҕастылар.
Учуутал 19-с кинигэтэ буоларын курдук оҕолор төрөппүттэрин өйөбүллэринэн таҕыста. Кинилэргэ барҕа махтал!
|