Убаастабыллаах биир идэлээхтэрим – Мэҥэ-Хаҥалас улууһун үөрэҕиритин тиһигин

бары үлэһиттэрэ, педагогическай үлэ бэтэрээннэрэ!

Идэлээх бырааһынньыкпытынан – Аан дойдутааҕы Учуутал күнүнэн итиитик-истиҥник эҕэрдэлиибит! Эһиги күннэтэ түбүгүрэр сыралаах үлэҕит хас биирдии оҕо, ыччат үүнэн сайдан тахсарыгар, бу орто туруу дойдуга бэйэтин суолун-ииһин булунарыгар төһүү күүс буолара саарбаҕа суох. Күн бүгүн кэнчээри ыччаппыт үүнэн-сайдан тахсарыгар учууталлар үлэлээн-хамсаан сыраларын уура сылдьаллар. Улууспутугар кэлэр ситиһиилэр, кыайыылар-хотуулар – бу хас биирдиигит дьаныардаах үлэтин түмүгэ. Эһиги үрдүк ааккытын чиэскэ-бочуокка тутан киэҥ тутта ааттыыбыт.

Күннэтэ киирэр араас уларыйыыларга, олох-дьаһах тэтимирэн турар кэмигэр хас биирдиибититтэн тутулуктаах инники олохпут сайдыыта. Хас биирдии учуутал олох ирдэбилигэр сөп түбэһэн, сайдыы иннигэр сылдьан, инникини өтө көрөн айымньылаах үлэтин тэрийэрэ тоҕоостоох. Үөрэҕирии тиһигэр уларыйыылар киирэллэр. Бу уларыйыыларга хас биирдиибититтэн бэлэм буолуу эрэйиллэр.

Күндү учууталлар!

Эһиги дьулуурдаах үлэҕитинэн Мэҥэ-Хаҥаласпыт үөрэҕириитин тиһигэ үс үйэни уҥуордаан сайдан кэллэ. Үөрэх тэрилтэлэригэр хас биирдии үгэс, хас биирдии саҥаны киллэрии инники күөнүгэр Учуутал турар. Эһиги күннэтэ толорор, сороҕор көстүбэт, сороҕор ситэ сыаналаммат дьаныардаах үлэҕит олохпут сүрүн оҥкула. Улахан буукубаттан суруллар Учууталлар баар буоланнар сахабыт норуота сайдар саҕахтаах, тапталлаах улууспут инникигэ эрэллээх.

Эһиги сүрэххит уонна дууһаҕыт сылааһын оҕоҕо аныыр, кэнчээри ыччаппыт оҕо сааһын аргыһа буолар дьоллоох дьоҥҥут. Эһиэхэ кытаанах доруобуйаны, энчирээбэт эрэли, үксүү турар үөрүүнү, тосхойо турар дьолу баҕарабыт. Халлааҥҥыт өрүү ыраас буоллун, күҥҥүт сыдьаайа тыктын!

Мэҥэ Хаҥалас улууһун үөрэҕириигэ салалтатын начаалынньыга

Гаврил Николаевич Толстяков