«Тыа сирин бастыҥ педагога» күрэх быйыл улууспутугар бэһис төгүлүн ыытылынна. 13 үөрэх тэрилтэтиттэн 14 учууталлар, иитээччилэр, педагог-психологтар күрэххэ кыттан уопуттарын үллэһиннилэр.

Тыа сиригэр олорор, үлэлиир педагогтар уопсастыбаннай олох киинигэр сылдьалларын быһыытынан араас бырайыактары олоххо киллэрэллэр. Күрэх кыттыылаахтара көҕүлээбит социокультурнай бырайыактарын онлайн форматынан билиһиннэрдилэр. Салгыы күннэтэ уруокка, дьарыкка туттар технологияларын, ньымаларын кэпсээтилэр.

Ахсынньы 26 күнүгэр А.В.Чугунов аатынан Мэлдьэхси орто оскуолатыгар күрэх кыттыылаахтара аһаҕас уруоктары, дьарыктары ыыттылар. Мэлдьэхси орто оскуолата күрэх былаһааккатын быһыытынан талыллыбыта түбэспиччэ буолбатах. «Тыа сирин бастыҥ педагога-2021» күрэх муҥутуур кыайыылааҕынан бу оскуола педагог-библиотекара Протопопова Александра Павловна буолбута.

«Тыа сирин бастыҥ педагога-2022» күрэх 3 түһүмэҕин түмүгүнэн 4 лауреат быһаарыллан финалга кытынна. Финалга күрэх кыттыылаахтара төрөппүт мунньаҕын ыыттылар. Кинилэр дьиэ-кэргэҥҥэ сахалыы саҥаны сайыннарыы, кинигэ ааҕыытын көҕүлээһин, үлэнэн иитии, оҕону куһаҕан дьаллыктан харыстааһын проблемаларын тула кэпсэтиини тэрийдилэр.

«Тыа сирин бастыҥ педагога-2022» күрэх түмүктүүр чааһыгар улуустааҕы үөрэҕирии салалтатын начальнига Никифоров Н.Л., үөрэх үлэһиттэрин профсоюһун улуустааҕы территориальнай тэрилтэтин председателэ Скрябин И.М. кыттыыны ыллылар. Күрэх кыттыылаахтарын Мэлдьэхси орто оскуолатын дириэктэрэ Сыромятникова Л.Д., үөрэнээччилэр эҕэрдэлээтилэр.

Үөрэх үлэһиттэрин профсоюһун улуустааҕы территориальнай тэрилтэтин председателэ Скрябин И.М. күрэх лауреаттарыгар дипломнары, өйдөбүнньүк бэлиэлэри туттарда. «Тыа сирин бастыҥ педагога-2022» күрэх лауреатын үрдүк аатын сүктүлэр Бырама уопсай үөрэхтээһин оскуолатын физкультураҕа учуутала Васильева Прасковья Кузьминична, Наахара орто оскуолатын иитээччитэ Кузьмина Анастасия Николаевна, Тумул орто оскуолатын иитээччитэ Трифонова Зоя Михайловна. Баатаратааҕы «Кэскил» уһуйаан иитээччитэ Попова Марфа Прокопьевна социокультурнай бырайыага онлайн-куоластааһын түмүгүнэн бастыҥынан ааттанна.

Улуустааҕы үөрэҕирии салалтатын начальнига Никифоров Н.Л. күрэх кыттыылаахтарыгар эҕэрдэтин тиэртэ уонна муҥутуур кыайыылаах аатын иһитиннэрдэ. «Тыа сирин бастыҥ педагога-2022» күрэх муҥутуур кыайыылааҕынан Ороссолуода орто оскуолатын саха тылын уонна литературатын учуутала Бочкарева Анастасия Алексеевна ааттанна. Муҥутуур кыайыылаахха диплом, кубок уонна үөрэх үлэһиттэрин профсоюһун улуустааҕы территориальнай тэрилтэтиттэн сыаналаах бэлэх туттарылынна. Харда тылыгар Бочкарева А.А. күрэх тэрийээччилэригэр, кинини өйөөбүт, күрэххэ бэлэмнээбит кэллиэгэлэригэр махтанна.

Үүнэр 2023 сылга, Педагог уонна настаабынньык сылыгар, «Тыа сирин бастыҥ педагога» күрэх Ороссолуода орто оскуолатыгар ыытыллыа. Күрэх бары кыттыылаахтарыгар салгыы чэгиэн туругу, айымньылаах үлэни, үрдүк ситиһиилэри баҕарабыт.

Сидорова ТВ,

информационнай-методическай отдел начальнига