Муус устар 21 күнүгэр эбии үөрэхтээһин киинигэр иккис сылын улуустааҕы «Творческий шаг» эбии үөрэхтээһин куруһуоктарыгар аналлаах научнай –практическай ааҕыы буолан ааста. Быйылгы ааҕыы Россияҕа экология, Саха сиригэр ыччат, улууспут үөрэҕириитин ситимигэр оҕо көҕүлээһинин сылын чэрчититинэн ыытылынна. Уопсайа 9 эбии үөрэхтээһин филиалыттан 54 үөрэнээччи кыттыыны ылла. Оҕолор чинчийэр үлэлэрин эбии үөрэхтээһин киин үлэһиттэрэ, «Сайдыс» киинтэн Нестерова Н.Ф., киэһээҥҥи оскуолаттан Андросова Л.Н. сыаналаатылар.

Оҕолор прикладной-декоративнай, муода уонна дизайн, аныгы эйгэ, кыраайы үөрэтии, культура уо.д.а. хайысхаларынан кэпсээтилэр. Оҕо манна бэриллибит бириэмэ иһигэр аудитория иннигэр кэпсииргэ, саҥарарга, санаатын сайа, үлэтин сүмэтин чопчу этэргэ, боппуруостарга эппиэттииргэ, туһааннаах литератураны кытта үлэлииргэ, гипотеза туруоран, ону дакаастыырга үөрэнэр. Билиҥҥи оҕолор чинчийэр темалара олус киэҥ, интэриэһинэй.

Ол курдук, түмүккэ кыайыылаахтарынан буоллулар:

1.  Скрябин Минтимир - 3 кыл., «Сиэлтэн оонньуур оҥоһуктар технологиялара». Эбии үөрэхтээһин Аллараа Бэстээх №2 филиала (сал. Канаева Нь. Т.)

2.  Захарова Маша -8 кыл., «Натуральный мед из растений местности Нижний Бестях » Аллараа Бэстээх №2 оскуолата (сал. Яковлева Т.С.).

3.  Яковлева Алена -6 кыл., «Полезные и вредные напитки» ЦДОД Майа (сал. Скрябина М.Г.)

4.  Колмакова Арина -8 кыл., «Создание образа Аан Алахчын в этно моде » Эбии үөрэхтээһин Аллараа Бэстээх №2 филиала (сал. Канаева Нь.Т.)

5.  Тимофеев Эрчим - 7 кыл., «П.А.Ойуунускай «Дьулуруйар Ньургун Боотур – олоҥхотугар абааһы бухатыыр уратыта» ЦДОД Майа сал. Слепцова А.И.

Бары кыттааччыларга туоһу суруктар, анал грамота, диплом туттардылар. Инникитин кыайбыт оҕолор «Инникигэ хардыы» НПК-ҕа, олимпиадаҕа кыттыахтара.

Надежда Федорова