Тулуйхан - дьолу туойар түһүлгэ
Тулуйхан - ырыа-тойук лааҕыра
Сааскы ылааҥы сынньалаҥ күннэргэ улууспут оҕолоругар «Тулуйхан» ырыа лааҕыра оҕону эбии үөрэхтээһин киинигэр быйыл 3 сылын үлэлээтэ. Тиэлиги, Майа, Хара, Аллараа Бэстээх, Балыктаах нэһилэгиттэн уопсайа 20-чэ оҕо дьарыктанна. Салайааччы Христофор Саввинов «Тулуйхан» лааҕырга биэс күн устата утумнаахтык дьарыктаата, ырыа арааһын үөрэттэ. Ырыа куттаах оҕолорбут отчуоттуур кэнсиэрдэрэ Хара нэһилиэгин «Айыллаан» культура киинигэр буолан ааста. Отчуоттуур кэнсиэргэ оҕолор соҕотохтуу, ансаамбылынан ыллаан дьиэрэттилэр, «Мелодика» ансаамбыл салайааччыта Лена Апросимова, эбии үөрэхтээһин педагогтара кинилэри ситэрэн биэрдилэр. Үгүс төрөппүттэр, оҕолор кэнсиэри астыннылар:
Оксана Никанорова – төрөппүт (Аллараа Бэстээх):
- Каникул кэмигэр маннык лааҕыр үлэлээбитэ олус үчүгэй. Оҕом ыллыырын истэн олус үөрдүм. Соҕотохтуу кыбыстан ыллаабат этэ, бүгүн наһаа үчүгэйдик ыллаата. Оҕо маннык лааҕырга сылдьан дьарыктанан сайдар дии саныыбын.
Милена Слепцова - Ф.Г.Охлопков аат. Майа орто оскуолатын 5 «а» кыл. үөрэнээччитэ:
- Мин «Тулуйхан» лааҕырыгар үһүс сылбын дьарыктанабын, ыллыырбын сөбүлүүбүн. «Ардах», «Саҥа күн», «Сырдык ууһу тэнитиэххэ», «Хомус» диэн ырыалары үөрэттим. Христофор Эдуардович биһигини элбэххэ үөрэттэ. Эһиил бу лааҕырга үөрэ-көтө кэлиэҕим.
Христофор Саввинов – «Тулуйхан» лааҕыр салайааччыта (Дьокуускай):
- Бу биэс күн устата уопсайа 19 ырыаны үөрэттибит. Наһаа көхтөөх, бэһиэлэй, ыллыан баҕалаах оҕолору кытта алтыспыппыттан олус үөрдүм. Оҕолорго ырыанан дьарыктана, ырыалыын аргыстаһа сылдьалларыгар баҕарабын. Эһиил көрсүөххэ диэри!
Инникитин «Тулуйхан» ырыа лааҕыра Амма улууһугар Сэргэ-Бэскэ, Уус-Алдан Бороҕонугар үлэлиэҕэ.
Надежда Федорова
|