-
Кулун тутар 14 күнүгэр Тарат сүрүн уопсай үөрэхтээһин оскуолатыгар Саха национальнай гимназиятын иһинэн үлэлиир «Айыы кыһатын» салайааччыта Шамаева Л.П., директоры иитии чааһыгар солбуйааччы Каженкин Р.Н. – Арчы Уола, иитэр – үөрэтэр үлэҕэ директоры солбуйааччы Сухаринова О.П., төрүт культура учуутала Никитина Нь.Г. кэлэн ыалдьыттаатылар. Оскуола салайааччыта Лебедева П.Е. оскуола ис эйгэтин, үлэтин – хамнаһын билиһиннэрдэ. Көрсүһүү чэрчитинэн төгүрүк остуол тула санаа атастаһыыта буолла. Ыытыллыбыт үлэ түмүгүнэн Тарат сүрүн уопсай үөрэхтээһин оскуолата уонна «Айыы кыһата» бииргэ үлэлээһиннэрин хайысхаларын торумнаатылар.
2. Кулун тутар 19 күнүгэр Тарат сүрүн уопсай үөрэхтээһин оскуолатыгар биир ситимҥэ киирэн үлэлэһэн эрэр Тыыллыма орто оскуолатын уһуйааччылара кэлэн ыалдьыттаатылар. Коллектив оскуола эйгэтин кытта билиһиннэрдэ. Көрсүһүү чэрчитинэн «Сахалыы тыыннаах оскуоланы тэрийии” диэн тиэмэлээх сүбэ мунньах ыытылынна. Уһуйааччылар бэйэлэрин көрүүлэригэр саха тыыннаах оскуолата хайдах буолуохтааҕын проект оҥорон көмүскээтилэр.
3. Кулун тутар 25 күнүгэр Саха тыыннаах оскуолалар ситимин Тарат уонна Бырама кыһаларын сүбэ мунньаҕа буолан ааста. Ыалдьыттар оскуолаҕа тэриллибит олонхо эйгэтин, коллективы кытта билистилэр. Төгүрүк остуол тула Саха тыыннаах кыьалар торумнарын ырытыһыы, инники соруктары көрүү, санаа атастаһыыта таҕыста. Инникитин салгыы биир санааҕа киирэн таһаарыылаахтык үлэлииргэ түмүк оҥоһулунна.
4. Кулун тутар 28 кунугэр Дьокуускай куоракка Пединститут иһинэн этнокультурнай үөрэхтээһин научнай лабараториятын “Этнокультурное образование в условиях реализации ФГОС” республиканскай семинар-конференцията буолан ааста. Тарат сүрүн уопсай үөрэхтээһин оскуолата «Айыы сырала –олонхо педагогиката: олоххо киллэрии суола-ииһэ» программа туһунан сырдатта.
5. Муус устар 2 күнүгэр Мэҥэ-Хаҥалас улууһун Чыамайыкы нэһилиэгэр олонхо күнэ буолан ааста. Тарат сүрүн уопсай үөрэхтээһин оскуолатын директора Лебедева П.Е. уонна саха тылын учуутала Иванова К.Д. Олоҥхо ассоциятын кытта экспедицияҕа кыттан кэллилэр. Тэрээһин чэрчитинэн түөлбэнэн саха аһын көрүү күрэҕэ буолла. Түөлбэлэр саха төрүт аһын, Чыамайыкы сирин-дойдутун баайыттан астаммыт ас арааһын дьүүлгэ таһаардылар. Тэрээһини үөрүүлээхтик аһыы сиэрин туомун кэнниттэн Мэҥэ-Хаҥалас Олонхо дьиэтин артыыстара Олонхону куолаан толоруу холобурун ыалдьыттарга, олохтоохторго көрдөрдүлэр. Чыамайыкы орто оскуолатын, култуура дьиэтин үлэһиттэрэ кыттыылаах эҕэрдэ кэнсиэр кэннэ саха таҥаһын көрүү буолла. Тэрээһин Чыамайыкы түөлбэ оһуохайынан түмүктэннэ.
|