Быйыл биһиги Улуу Кыайыы 79 сылын бэлиэтээтибит.

Аҕа саастаах көлүөнэ дьоммут бүгүҥҥү сайдыылаах, дьоллоох олох туһугар сэрии толоонугар олохторун толук уурбуттара, тоҥору-аччыктыыры аахсыбакка тыылга Кыайыыны уһансыбыттара.

Бу иэдээннээх сэриигэ кыттыбыт буойуннар ааттарын кэриэстээн, Төҥүлү орто оскуолатын 10-с кылааһын үөрэнээччилэрэ нэһилиэк дьонун-сэргэтин болҕомтотугар Улуу Кыайыыга анаммыт «Эргиллии» дьүһүйүүнү таһаардылар. Дьүһүйүүнү олохтоох «Эйгэ» култуура дьиэтин исписэлииһэ Матрена Олесова туруорда. Манна кыттыыны ылбыт оҕолор сэрии ыар кэмнэрин олус итэҕэтиилээхтик оонньоон көрдөрдүлэр.

Дьүһүйүү уоттаах сэрии иэдээннээх сылларын кэлэр кэнчээри ыччат өйдүү-саныы, аҕа көлүөнэҕэ махтана сылдьарыгар көмөлөөх буолбута саарбаҕа суох.