«Кэнчээри ыччаты кэрэҕэ уһуйар

Иитээччи үлэтэ – идэбит биһиэнэ,

Оҕо үөрэриттэн үрүҥ күн сыдьаайар

Оҕо саҥатыттан ийэ сир чэлгийэр

Оҕо баар буолан олохпут салҕанар

Оҕо баар буолан омукпут тэнийэр...»

Маннык истиҥ-сылаас тылларынан, бүгүн, ахсынньы 9 күнүгэр, Төхтүрдээҕи оҕону сайыннарар киин «Мичил» оҕо уһуйаанын 50 сыллаах үбүлүөйдээх тэрээһинэ ыытылынна.

Үйэ чиэппэрэ кэм устата ааспыт үлэ түмүгүн бэлиэтиир үбүлүөйдээх тэрээһини эҕэрдэ тылынан Ил Түмэн тыа сиригэр уонна аграрнай бэлиитикэҕэ сис кэмитиэтин бэрэссэдээтэлэ Андрей Находкин арыйда. Итиэннэ “Мичил” оҕону сайыннарар киин бэтэрээнигэр Геннадий Яковлевка, иитээччигэ Марианна Сергучеваҕа СӨ Ил Түмэн Судаарыстыбаннай мунньаҕын тыа сиригэр уонна аграрнай бэлиитикэҕэ сис кэмитиэтин Бочуоттаах грамотатын туттарда. Ону таһынан Ил Түмэн наукаҕа, үөрэххэ, култуураҕа, сонуну киэҥник тарҕатар ситимнэргэ уонна уопсастыбаннай тэрилтэлэр дьыалаларыгар сис кэмитиэтин бэрэссэдээтэлин Бочуоттаах грамотатын оҕо уһуйаанын улэһиттэрэ Людмила Колосова, Лена Иванова, Марианна Митрофанова туттулар.

Салгыы эҕэрдэ тылы Мэҥэ Хаҥалас улууһун баһылыгын социальнай боппуруостарга уонна имиджевэй бэлиитикэҕэ солбуйааччы Альбина Григорьева эттэ. Ону тэҥэ “Мичил” оҕо уһуйааныгар оҕо оонньуур былаһааккатын оборудованиетыгар улуус дьаһалтатын аатыттан 280 тыһыынча суумалаах туоһу суругу үөрүүлээх быһыыга-майгыга туттарда.

Маны тэҥэ Альбина Андреевна оскуола иннинээҕи саастаах оҕолору үтүөҕэ-кэрэҕэ үөрэтиигэ, саха култууратын үйэтитиигэ, сайыннарыыга кылааттарын иһин “Саха Өрөспүүбүлүкэтин култууратын туйгуна” бэлиэни уһуйаан иитээччитигэр Айталина Верховцеваҕа, улуус баһылыгын Бочуоттаах грамотатын бэтэрээн иитээччи Марианна Баишеваҕа, иитээччилэргэ Мария Шаринаҕа, Саргылана Неустроеваҕа, махтал суругу Рада Пермяковаҕа туттарда.

Тэрээһин үөрүүлээх чааһыгар улуустааҕы үөрэҕин салалтатын начаалынньыга Николай Никифоров “Мичил” уһуйаан кэлэктиибигэр компьютернай оборудование атыылаһарга 115 тыһыынча суумалаах туоһу суругу туттарда уонна уһуйаан кэлэктиибигэр уһуннук үлэлээбит, оҕо иитиитигэр кылааттарын киллэрбит бэтэрээннэргэ, иитээччилэргэ, үлэһиттэргэ эҕэрдэ суруктары туттарда.

Мэҥэ Хаҥалас улууһун дьаһалтатын пресс-сулууспата