Сэтинньи 3 күнүгэр «Кыталык» оҕону сайыннарар эстетическэй кииҥҥэ "Саха республикатын Ил Дарханын 7 сорудаҕа" марафон старда Мэҥэ-Хаҥалас улууһун оҕо общественнай тэрилтэлэригэр бэрилиннэ. Бу тэрээһин улууспут 20 оскуолатын лидерадарын, оҕо тэрилтэтин салайааччыларын, активист оҕолорун, уопсайа 75 киһини түмтэ. Бу күн быйылгы үөрэх дьылыттан «Мэҥэ Кэскилэ» улуустааҕы оҕо тэрилтэтэ эбии үөрэхтээһин киинин иһинэн былааннаахтык барыаҕын туһунан дириэктэр Аргунова С.А. этиитинэн саҕаланна. Ил Дархан 7 сорудаҕа оҕо тэрилтэлэрин үлэтин уопсай ситимниир, түмэр сүрүн сыаллаах. Бу туһунан сиһилии улуустааҕы үөрэҕирии салалтатын иитии уонна эбии үөрэхтээһин отделын начальнига Билюкина М.Ю. билиһиннэрдэ.
Салҕыы лидердар бэйэлэрин истэригэр ыытан олорор үлэлэрин, ханнык бырайыактары олоххо киллэрэн олороллорун туһунан сырдаттылар. Тэрээһин чэрчитинэн «Мэҥэ Кэскилэ» улуустааҕы оҕо тэрилтэтин лидеры талыы буолла. 2016-2017 үөрэх дьылыгар лидерынан үлэлээбит В.П.Ларионов аатынан Майатааҕы уопсай үөрэхтээһин оскуолатын 11 кылааһын үөрэнээччитэ Дмитриева Алена туох үлэ барбытын туһунан отчуота иһилиннэ. Быйылгы быыбарга уопсайа 5 кустовой холбоһуктан кандидат турда. Ол курдук Төҥүлү эҥэртэн Федорова Юля (Дьабыыл, 10 кыл.), Балыктаах холбоһугуттан Молуков Коля (Балыктаах, 10 кыл.), өрүс эҥэр сытар нэһилиэктэртэн Борисова Настя (Хаптаҕай, 10 кыл.), киин холбоһуктан Петров Валера (Тыыллыма, 10 кыл.) Майа нэһилиэгиттэн Егорова Наташа (Майатааҕы В.П.Ларионов аатынан оскуола, 10 кыл.) программаларын билиһиннэрдилэр, улууспутугар биир кэлим форма барылын толкуйдаан кэлэн, мустубут дьон иннигэр көмүскээтилэр, ыйытыктарга хоруйдаатылар. Бу түмүгүнэн куоластааһын ыытылынна, манна 48 киһи кыттыбытыттан, Егорова Наташа 27 быыбардааччы итэҕэлин ылан «Мэҥэ Кэскилэ» улуустааҕы оҕо тэрилтэтин лидерынан талылынна.
Бу күн оҕолор уонна эдэр салайааччылар төгүрүк остуоллара буолла. Көрсүһүү Белолюбскай Федор Федорович (Тыыллыма оскуолатын дириэктэрэ), Судико Павел Анатольевич (Майа сэлиэнньэтин депутаттарын сэбиэтин бэрэссэдээтэлэ), кыттыылаах сүрдээх интэриэһинэйдик, тэтимнээхтик ааста. Бу бириэмэҕэ оҕо тэрилтэтин салайааччыларыгар былааннар, инникитин ханных хайысханан салайтаран үлэ барыан туһунан кэпсэтии буолла. Кэпсэтии Бүтүн дойдутааҕы общественно-государственнай «Российское движение школьников» хамсааһыҥҥа киирии, улууспут оҕо тэрилтэтигэр биир кэлим атрибут толкуйун, ыйын ахсын чопчу күн анаан методкүннэри тэрийии, оҕо хамсааһынын сайдыытыгар сэбиэт тэриллиитин туһунан буолла.
Күн иккис аҥарыгар үөрүүлээх быһыыга улуустааҕы үөрэҕирии салалтатын начальнигын солбуйааччы Тимофеева В.А. лидердарга «Мэҥэ Кэскилэ» оҕо тэрилтэтин чилиэнэ буолбуттарын туһунан удостоверение туттарда. Ону тэҥэ бу күн 2017-2018 үөрэх дьылыгар Павловскай, Балыктаах, Табаҕа оскуолаларыгар, Майатааҕы лицейгэ «Российское движение школьников» хамсааһын кэккэтигэр киирбиттэрин туһунан туоһу суруктар туттарылыннылар.
Тэрээһини эбии үөрэхтээһин киинин вокальнай-инструментальнай куруһуогун иитиллээччилэрэ (сал. Босиков Ф.А.), «Мэҥэ Кэскилэ» оҕо тэрилтэтин активистарын эҕэрдэ нүөмэрдэринэн киэргэтилиннэ. Түмүгэр оҕолор сорудахтарын ылан, үлэлэрин эбии үөрэхтээһин киинин кытта ситимнээхтик ыытарга былааннаатылар.
|