Балаҕан ыйын 11, 12 күннэригэр XI төгүлүн ыытыллар Республика баһылыгын Кубогар оскуолаҕа үөрэнэр оҕолорго чэпчэки атлетикаҕа эстафета буолан ааста. Республикаттан 23 оскуола кэлэн кытынна. Биһиги улууспутуттан бу саас ыытыллыбыт улуус Главатын Кубогын кыайыылааҕа Төхтүр орто оскуолата кытынна. Ааспыт саас улууска бастаан Республика Президенин Кубогар сүүрүүгэ иккис бочуоттаах миэстэни ылан тураллар. Быйыл көрдөрүүбүт орто соҕус буолла. Күһүн сүүрүү балаһыанньатыгар бүтэһик икки дистанцияны кылгаппыттара биһиэхэ оҕустарыылаах буолла. Былырыын икки кэнники дистанцияҕа оҕолорбут сититэлээн хамаанда иккискэ тахсыбыта. Уопсай финальнай сүүрүүгэ 6 хамаанда таҕыста. Кыайыылаахтарынан буоллулар: бастакы миэстэни Нерюнгри 1 нүөмэрдээх гимназиятын үөрэнээччилэрэ ыллылар, бириэмэтэ 8 м.26 сек. кэлэн. Иккиһи Л.А. Колосова аатынан Дьокуускай куорат хамаандата, бириэмэтэ 8 мин.32 сек. үһүс бириистээх миэстэҕэ Уоһээ Бүлүү М.Т. Егорова аатынан оскуола таҕыста, бириэмэтэ 8 мин.33 сек.
Бастаабыт хамаанда Республика Главатын елкатыгар сылдьар путевканы, көһөрүллэ сылдьар Глава Кубогын ылла. Медаллары, грамоталары Правительства Председателин бастакы солбуйааччыта Ф.В.Габышева туттарда. Иккистээбит хамаанда Саха сирин спортдун Министра олохтообут бирииһин ылла. Грамоталары, медаллары туттарда Спорт министрын солбуйааччы В.В.Агафонов. Үһүс буолбут хамаанда «Сахатранснефтегаз» бирииһин ылла. Медаллары, грамоталары туттурда, «Сахатранснефтегаз» председателя И.К. Макаров.
Физкультура учууталларын республикатааҕы түмсүүлэрин III төгүлүн ыытыллар сэттэ этааптаах сүүрүү эстафетатыгар эмиэ табыллыбакка бириистээх миэстэттэн маттыбыт. Былырыын иккис буолан турабыт, иллэрээ сыл төрдүс буолбуппут.
|