Муус устар 26 күнүгэр Майаҕа «Үөрэтэр-оҥорон таһаарар киин» тэрилтэтигэр Саха АССР төрүттэммитэ 100 сылыгар аналлаах үөрүүлээх тэрээһин ыытылынна.
Тэрээһин СӨ култууратын туйгуна Виталий Очиров алгыс этиитинэн, аал уот иччитин аһатар сиэринэн-туомунан саҕаланна. Мустубут дьону сахалыы сиэринэн арыылаах алаадьынан, уохтаах кымыһынан күндүлээтилэр.
Саха АССР төрүттэммитэ 100 сылын устуоруйатыгар аналлаах видеоролик көрдөрүлүннэ. «Үөрэтэр-онорон таһаарар киин» салайааччыта Николай Тарасов кэлэктиип үлэһиттэригэр өрөспүүбүлүкэбит үйэлээх үбүлүөйүнэн истиҥник эҕэрдэлээтэ. Кини бэлиэ күн Саха сирин хас биирдии олохтооҕор сүдү суолтатын быһааран Саха сиригэр автономия төрүттэммит устуоруйатыттан кылгастык билиһиннэрдэ.
Үөрүүлээх тэрээһин биир бэлиэ түгэнинэн тэрилтэҕэ уһун сылларга үтүө суобастаахтык үлэлии сылдьар үлэһиттэргэ «Саха АССР 100 сыла» бэлиэни туттарыы буолла. Наҕараадаламмыт ортолоругар эбии үөрэхтээһин педагога Сергей Иванов, пилорама хаһаайыстыбатын сэбиэдиссэйэ Василий Пономарев, производственнай сыах маастар-столяра Максим Петров, гаас хочуолунайын оператора Виталий Дулов, иис сыаҕын ыстаарсай маастара Марфа Никитина, тэхиньиичэскэй үлэһиттэр Александра Брызгалова, Мария Пшенникова о.д.а бааллар.
Саха буолары бигэргэтэн, илии илииттэн ылсыһан, тэрээһин түмүк чааһа оһуокайынан түмүктэннэ. Оһуокайы Виталий Очиров таһаарда. Кэлэктиип үлэһиттэрэ бары бу күн дириҥ суолтатын өйдөөн сүргэлэрэ көтөҕүлүннэ, бары сахалыы таҥнан-симэнэн кэлэн, бырааһынньык ураты тыыннанна. Тэрээһини эбии үөрэхтээһин педагога Вячеслав Санников иилээн-саҕалаан ыытта.
Мария Борисова, директоры үөрэтэр-иитэр үлэҕэ солбуйааччы
|