 Олунньу 7 күнүгэр Аллараа Бэстээх “Парус” киэҥ уораҕайыгар 2023 сылга бүттүүн Россия үрдүнэн биллэриллибит Педагог уонна наставник сылын үөрүүлээхтик сабыы уонна улууспутугар Үөрэхтээһин төрүттэммитэ 150 сылын көрсөр бэлиэ тэрээһин ыытылынна.
Тэрээһин бастакы чааһыгар ыҥырыылаах ыалдьыттар улууспут нэһилиэктэринэн үөрэхтээһин сайдыытын сырдатар быыстапканы, виртуальнай, интерактивнай картаны көрдүлэр-иһиттилэр.
Үөрүүлээх түгэҥҥэ мустубут ыалдьыттар Педагог уонна наставник сылыгар ыытыллыбыт араас таһымнаах күрэхтэр кыайыылаахтарын сылаас ытыс тыаһынан көрүстүлэр.
Салҕыы Мэҥэ Хаҥалас улууһун аҕа баһылыга Тихонов Дмитрий Иванович, Саха республикатын Ил Түмэн судаарыстыбаннай мунньаҕын депутата, наукаҕа уонна үөрэххэ сис кэмитиэтин бэрэссэдээтэлэ Григорьева Антонина Афанасьевна, Саха республикатын үөрэҕи сайыннарар уонна идэ таһымын үрдэтэр Николай Донской-II аатынан институт директора Павлов Ньургун Михайлович, Мэҥэ-Хаҥалас үөрэҕириитин салалтатын начальнига Толстяков Гаврил Николаевич, Мэҥэ-Хаҥалас үөрэҕин үлэһиттэрин идэлээх буолуу профсоюзтарын бэрэссэдээтэлэ Скрябин Иннокентий Михайлович эҕэрдэ тыл эттилэр уонна наҕараада туттардылар.
Түмүккэ улуус уһуйааннарын, оскуолаларын оҕолоро уонна иитээччилэрэ, учууталлара эҕэрдэ нүөмэрдэрин көрдөрдүлэр.
Улахан буукубаттан суруллар Учууталлар, иитээччилэр баар буоланнар сахабыт норуота сайдар саҕахтаах, тапталлаах улууспут инникигэ эрэллээх. Кэлэр да өттүгэр бары бииргэ, биир сомоҕо буоламмыт кэнчээри ыччаппыт сайдарын туһугар үлэлии-хамсыы туруохпут, кинилэр кэлэр кэскиллэрин түстүөхпүт.
ТЭРЭЭҺИН ХААРТЫСКАЛАРА, ВИДЕОЛАРА https://disk.yandex.ru/d/yhbQKG0RtNSkzA
|
