Сэтинньи 8 күнүгэр И.М. Романов аатынан Төхтүр орто оскуолатыгар Мэҥэ Хаҥалас улууһун үөрэҕириитин Сэбиэтин аһаҕас мунньаҕа тэрилиннэ.

"Мэҥэ кэскилэ-7" үөрэхтээһин сайдыытын бырагырааматын СӨ учууталларын уонна педагогическай уопсастыбаннас 14-үс сийиэһин кэнсиэпсийэтигэр сыһыаран олоххо киллэрии дьүүллэһилиннэ. Киирии тылыгар улуустааҕы үөрэҕирии управлениетын начаалынньыгын эбээһинэһин толорооччу Николай Никифоров Сэбиэт саҥа састаабын билиһиннэрдэ. Сэбиэт саҥа састаабыгар ‒ Сэбиэт бэрэссэдээтэлинэн улуус баһылыгын социальнай боппуруостарга солбуйааччыта Альбина Григорьева, Николай Никифоров бэрэссэдээтэли солбуйааччы, Елена Аммосова Хара орто оскуолатын төрөппүт кэмитиэтин бэрэссэдээтэлэ, Милан Илларионов Чүүйэ орто оскуолатын дириэктэрэ, Петр Куличкин педагогическай үлэ бэтэрээнэ, Алексей Неустроев Майа сэлиэнньэтэ тыа сирин түөлбэтин баһылыга, Владислав Неустроев оройуон дьокутаата, Надежда Романова Төхтүр "Мичил" оҕо саадын сэбиэдиссэйэ, Иннокентий Скрябин үөрэх үлэһиттэрин боропсойууһун бэрэссэдээтэлэ, Ольга Сотникова Төҥүлү орто оскуолатын дириэктэри иитэр-үөрэтэр үлэҕэ солбуйааччыта, Александр Шепелев үп салалтатын салайааччыта.

Сүбэ мунньахха "Мэҥэ-кэскилэ-7" бырагырааманы олоххо киллэрии хаамыытын кэнсиэпсийэтигэр бырагырааманы сөп түбэһиннэрэн салгыы хайдах үлэлиирин сүбэлэстилэр. Ааспыт ыйга буолбут СӨ учууталларын уонна педагогическай уопсастыбаннаһын 14-үс сийиэһин хаамыытын уонна ылыммыт докумуоннарын билиһиннэриини үөрэх управлениетын кылаабынай исписэлииһэ, сийиэс дэлэгээтэ Николай Аржаков оҥордо. Үөрэнээччилэр үөрэхтэрин үрдэтиигэ социум сабыдыалын туһунан иһитиннэриини Ольга Сотникова оҥордо. Агротехнологическай үөрэхтээһин кыһалҕалара уонна инники сайдыыта тиэмэҕэ Мэлдьэхси орто оскуолатын дириэктэрэ Лариса Сыромятникова дакылаттаата. Стратегическай сиэссийэ үлэтин уонна хаамыытын информационнай-мэтэдиичэскэй салаа начаалынньыга Татьяна Сидорова билиһиннэрдэ.

Күн иккис аҥарыгар 4 былаһаакканан стратегическэй сиэссийэ ыытылынна. Сэбиэт мунньаҕа пленарнай чааһынан түмүктэннэ. Бөлөх спикердэрэ үөрэҕирии Сэбиэтин чилиэттэрэ сүбэ мунньах түмүгүн таһаардылар.

Зоя Герасимова