Алтынньы 13 күнүгэр И.Г. Игнатьев аатынан Хара спортивнай орто уопсай үөрэхтээһинин оскуолатыгар Неустроева Феврония Павловнаҕа анаммыт «Сырдык сулус буолан сыдьаайыа» кинигэ сүрэхтэниитин тэрээһинэ үрдүк таһымҥа ыытылынна.

Ыҥырыылаах ыалдьыттар Феврония Павловна аймахтара, оҕо сааһын доҕотторо, бииргэ алтыспыт коллегалара. Тэрээһини ыытыста Сидорова Татьяна Васильевна – улуустааҕы үөрэҕирии салалтатын методическай отделын начальнига. Саҕаланыытыгар Дмитриева Татьяна Михайловна - улуустааҕы үөрэҕирии салалтатын библиотекара кинигэ ис тутулун, Новосибирскай куоракка бэчээттэммитин, 150 экземплярынан тахсыбытын, кинигэни Айыына Андреевна Неустроева, Марфа Петровна Лыткина таҥан оҥорбуттарын туһунан билиһиннэрдэ. Тыл бэрилиннэ Николай Лукич Никифоровка - улуустааҕы үөрэҕирии салалтатын начальнигар. Кини Феврония Павловналыын алтыһан ааспытын ахтан-санаан ааста уонна кинигэни хомуйсан оҥорсубут Марфа Петровнаҕа Мэҥэ Хаҥалас улууһун үөрэҕириигэ салалтатын Махтал суругун балтытыгар Антонина Петровнаҕа туттарда. Тыл барда Мэҥэ Хаҥаласка үөрэҕирии үлэһиттэрин идэлээх сойуустарын улуустааҕы территориальнай тэрилтэтин председателигэр Иннокентий Михайлович Скрябинҥа. Кини кинигэ күн сирин көрөрүгэр үбүнэн көпөлөспүтүгэр барҕа махталбын тиэрдэбин. Айматарыттан тыл эттилэр бииргэ төрөөбүт эдьиийэ Валентина Павловна Неустроева уонна быраата Афанасий Павлович Максимов.

Феврония Павловна олоҕун кэрчигинэн бииргэ алтыспыт доҕотторо, коллегалара истиҥ–иһирэх ахтыыларынан оҕо сааһын доҕоро Фекла Афанасьевна Федорова (Чирикова), бииргэ үөрэммит оҕолоруттан Марина Нитична Куличкина, Хабаровскайга бииргэ алтыспыт доҕотторуттан Пелагея Андреевна Бурнашева, Сыымахтан дьүөгэлэрэ Александра Ивановна Сергучева, Роза Романовна Борисова, Лена Павловна Потапова, үөрэнээччитэ Иван Николаевич Матвеев – Баатара нэһилитэгин аҕа баһылыга, Майа орто оскуолатыттан коллегата Тамара Федоровна Татаринова, Хара спортивнай лицейиттэн Мария Петровна Сидорова, үөрэнээчитэ Лариса Дмитриевна Сыромятникова – А.В. Чугунов аатынан Мэлдьэхси орто оскуолатын дириэктэрэ, Е.П. Эрчимэн аатынан Бырама ситэтэ суох орто оскуолатыттан Ирина Дмитриевна Рязанская, Наина Ивановна Ларионова, үөрэнээччитэ Люба Федорова, Майтааҕы киэһээҥҥи оскуолаттан Захар Николаевич Сидоров, Мэҥэ Хаҥалас үөрэҕириигэ салалтатыттан Вера Аркадьевна Тимофеева, Николай Петрович Тарасов ахтан-санаан аастылар.

Түмүктүүр чааска Феврония Павловна кыыһа Айыына Андреевна Неустроева ийэтин аатын үйэтитэр кинигэ үбүлээһинигэр көмөлөспүт дьоҥҥо махталын тиэртэ, минньигэс тордунан ыалдьыттары күндүлээтэ.

Феврония Павловна 1958 сыллаахха олунньу 10 күнүгэр Майа сэлиэнньэтигэр Павел Иннокентьевич уонна Мария Андреевна Неустроевтар дьиэ кэргэннигэр күн сирин көрбүтэ. Кини олоҕун кэрчигэ кинигэҕэ тиһиллибитэ аймахтарыгар, коллегаларыгар уонна кэнэҕиски ыччакка улахан суолталаах. Аймахтар балаһаларыгар төрүччү киирдэ. Түгэнинэн туһанан эдьиийбэр Клавдия Кимовнаҕа Неустроевтар төрүччүлэрин биэрбитин иһин махталым муҥура суох. Ону таһынан эбээбит Мария Андреевна төрдө-ууһа саха норуотун төрүттээччи - Эллэй Боотуртан 15 үйэттэн саҕалаан күн бүгүнүгэр дылы көлүөнэ сурукка тиһиллибитэ үөрүүлээх суол. Кинигэ ис хоһооно истиҥ, элбэх киһи ахтыыта киирбитэ үөрдэр. Майа орто оскуолатын ситиһиилээхтик бүтэрэн, Хабаровскайдааҕы педагогическай институт химико-биологическай факультетын бүтэрэн, төрөөбүт улууһугар Баатара оскуолатыгар үлэтин саҕалыыр. Үлэтигэр бэриниилээх буолан эдэр учуутал РСФСР үөрэҕириитин министерствотын Бочуотунай грамотатынан бэлиэтэнэр. Кэлин Майа орто оскуолатыгар, Хара спортивнай лицейыгар, К.О. Гаврилов аатынан Бүтэйдээх орто оскуолатыгар үлэлээн ааспыта. Бырама ситэтэ суох орто оскуолатыгар бастаан учууталынан, дириэктэри иитэр-үөрэтэр үлэ солбуйааччытынан, онтон дириэктэринэн таһаарыылаахтык үлэлээбитэ. Бырама оскуолатын 75 сыллаах өрөгөйдөөх үбүлүөйүн тэрийэн, оскуолаҕа литературнай кириитик, суруйааччы, педагог Егор Петрович Шестаков-Эрчимэн аатын иҥэрбиттэрэ. Үбүлүөй чэрчитинэн араас тэрээһиннэр, оскуола өрөмүөнүттэн саҕалаан музей арыллыытыгар, кинигэ таһааттарыытыгар тиийэ үрдүк таһымҥа ыытыллыбыттара. Кэлин улуустааҕы үөрэх салалтатыгар главнай специалиһынан үлэлии сылдьан Мэҥэ Хаҥалас Атлаһа диэн ыйынньык кинигэ тахсарыгар үлэни иилээн-саҕалаан ыыппыта. Атлас ис тутулун аныгы кэмҥэ эппиэттиир таһымнаахтык хомуйарга предметтэринэн сыһыаннаах учууталлары, учуонайдары мунньан, ситимнээн биир санааҕа үлэһиттэри түмэн, үлэлиир усулуобуйаны тэрийээччинэн сыһыарыллан үлэлээбитэ. Билигин Атлас киэн араҥаҕа тахсан, Мэҥэ Хаҥалас үөрэнээччилэригэр ыйынньык буолан күн бүгүнүгэр диэри туттуллар, туһаныллар.

Ийэм дьоҥҥо элэккэй сыһыаннааҕа, тэрийэр, түмэр дьоҕурдааҕа, ылыннарыылаах тыллааҕа, сонун идеялардааҕа. Үлэтигэр олус бэриниилээҕэ, эппиэтинэстээх, үрдүк культууралаах, киэҥ билиилээх этэ. Учуутал быһыытынан оҕолорго уустук предметы тиийимтиэ гына быһаарара, үөрэппит оҕолоро араас таһымнаах олимпиадаларга, научнай практическай конференцияларга ситиһиилээхтик кытталлара. Үгүстэрэ медицинскай, физкультурнай, геологическай үөрэхтэри бүтэрбиттэрэ, билигин идэлэринэн үлэлии-хамсыы сылдьаллар. Бииргэ алтыспыт дьонугар эрэллээх доҕор, сүбэһит, киэҥ-холку майгылаах, биир тылы булар үтүө-кэрэ киһи этэ.

Кинигэни хомуйан оҥорсубут Марфа Петровна Лыткинаҕа махталым муҥура суох. Кини иилээн-саҕалаан Хабаровскайга бииргэ үөрэммит доҕотторун ахтыытын хомуйан, кинигэ компьютернай версткатын уонна техническай редакторын быһыытынан үлэлэспитэ. Өҥө оҥорор тэрилтэлээх буолан төһүү күүс буолбута саарбаҕа суох.

Кыыһа Айыына Андреевна Неустроева –

Мэҥэ Хаҥалас үөрэҕириигэ салалтатын стратегическай сайдыы

уонна бырайыактаан салайыы отделын главнай специалиһа