Ахсынньы 19 күнүгэр Мэлдьэхсигэ улуус баһылыгын солбуйааччы И.П.Птицын, улуус спорка управлениетын начальнига А.Р.Брызгалов, Ю.Е. Никифоров - Саха сирин дуобакка федерациятын вице-президенэ, ХИФУ интеллектуальнай спорт көрүҥнэрин киинин салайааччыта арыаллаах Кытайтан икки киһилээх делегация кэлэ сырытта. Делегация салайааччыта Щи Вей - Кытай Хубей провинциятын олимпийскай киинин начальнига, Чжань Сяоцюань - Кытай Ухань куорат физическэй институтун учуутала, биомеханик учуонай, тылбаасчыт.
Күндү ыалдьыттары Надежда Карловна Андросова – Алгыстаана сахалыы алгыһынан, арыылаах алаадьынан, кымыһынан айах тутан көрүстэ. Көрсүһүү бастакы аҥара олохтоох оскуола оҕолорун уонна “Хатыҥчаан” оҕо саадын эҕэрдэ кэнсиэринэн киэркэйдэ. Салгыы оскуолабыт спортивнай саалатыгар саха омук төрүт оонньууларын: наарта үрдүнэн ойууну, маамыкта быраҕыыны, хаамыска, хабылык оонньууларын, анаан оҥоһуллубут улахан дуобат дуоскатыгар алын сүһүөх кылаас үөрэнээччилэрэ тыыннаах дуобат буолан, оонньоон көрдөрдүлэр. Бу оонньуу кэмигэр 64 харахтаах дуобат саарыстыбата Саха сирэ буоларын, ол курдук Аан дойду 7 төгүллээх, Францияҕа ыытыллыбыт Аан дойду интелиадатын чемпиона, аан дойду кылаастаах гроссмейстер Гаврил Колесов, Аан дойду 4 төгүллээх чемпиона, аан дойду кылаастаах гроссмейстер Николай Стручков, Аан дойду уонна Азия дуобакка федерацияларын президенэ Владимир Ильич Птицын, норуоттар икки ардыларынаа5ы категориялаах Пекиннээҕи интелиада кылаабынай судьуйатын бастакы солбуйааччы, ФМЖД маастара Дмитрий Васильевич Сыромятников Мэлдьэхси төрөөбүт – үөскээбит дойдулара буоларын оскуола о5олоро кэпсээбиттэрин кэлбит ыалдьыттар олус диэн сэргээтилэр-кэрэхсээтилэр.
Көрсүһүү иккис аҥарыгар оҕо саадын иитиллээччилэрэ уонна алын сүһүөх кылаас үөрэнээччилэрэ сүүс харахтаах дуобакка дьарыктана олороллорун кэтээн, интэриэһиргээн көрдүлэр. Кэлэр өттүгэр Саха сирэ уонна Кытай оҕолоро сүүс харахтаах дуобакка дьаныардаахтык дьарыктаналларыгар икки өттүттэн сөбүлэҥи түһэрсэн, бииргэ үлэлииргэ, сайдарга үлэлиэххэ наада диэн бэйэлэрин санааларын эттилэр уонна инникитин туруоруммут сыаллары олоххо киллэрэр бигэ эрэллээх тарҕастылар.
Түмүккэ бу көрсүһүүнү тэрийбит олохтоох дьаһалта баһылыгар В.Я.Шаринҥа, оскуола коллективыгар, директорга Р.В.Яковлевка махталларын биллэрдилэр.
Туйаара Игнатьева, Мэлдьэхси, “Үктэл” пресс-киин
|