Балаҕан ыйын 14, 15, 16 күннэригэр Мэҥэ-Хаҥалас улууһугар “Мэҥэ-Хаҥалас улууһугар үөрэҕирии сайдыытын тус сыаллаах хайысхалара” диэн тиэмэлээх үөрэҕирии үлэһиттэрин сүбэ мунньаҕа ыытыллынна.
Бу мунньах чэрчитинэн 14 чыыһылаҕа “Үөрэҕирии муниципальнай тиһигин сайдыыта: ситиһиилэр, проблемалар, инники көрүүлэр” тиэмэлээх стратегическэй сессия үлэлээтэ. Сессияҕа “Мэҥэ-Кэскилэ-7” тус сыаллаах муниципальнай программаны онорор айар бөлөх – 25 киһи кыттыыны ылла. Сессияны С. Н. Донской-II аатынан үөрэҕирии сайдыытын уонна идэни үрдэтэр институт директорын бастакы солбуйааччы Николай Иннокентьевич Бугаев салайан ыытта, институт нуучча уонна саха тылларын кафедратын сэбиэдиссэйэ Любовь Николаевна Андросова кыттыыны ылла.
Сессия саҕаланыытыгар улуус үөрэҕириитин тиүигэр баар проблемалараы, Россияҕа уонна Саха сиригэр үөрэҕирии тенденцияларын анализтааһын ыытылынна. Ол түмүгэр оҥоүуллуохтаах “Мэҥэ Кэскилэ - 7” программа 4 сүрүн хайысхата чопчулоанна:
- Аһаҕас үөрэхтээһин
- Аһаҕас үөрэхтээһин педагога
- Аһаҕас үөрэхтээһин эйгэтэ
- Аһаҕас үөрэхтээһиҥҥэ хаачыстыбаны салайыы
Бу хайысхалар «Инникигэ аһаҕас үөрэхтээһин» Саха Өрөспүүбүлүкэтин 2030 сылга дылы көҕүлээһинин кытта дьүөрэлэстэ, ол докумуон сүрүн хайысхаларыгар сөп түбэстэ.
Салгыы хас биирдии хайысханан рапид-форсайт технологиянан Дорожнай карта оҥорон көрдүбүт. Чуолаан, онлайн-үөрэтии, оҕо доруобуйатын харыстааһын, педагог профессиональнай таһымын үрдэтиигэ тус бэйэтин маршрутун оҥоруу курдук трендэр көрүлүннүлэр. Улуус педагогтарыгар аналлаах платформа, эбии үөрэхтээһин порталын тэрийии, педагогтарга аналлаах бырайыактыыр лааҕыры, оҕолор үөрэххэ мотивацияларын үрдэтэр сыаллаах Үөрэҕирии паркатын тэрийии курдук сонун идеялар этилиннилэр.
Айар бөлөхтөр үлэлэрин онлайн форматынан салҕыырга сорудах ыллылар, үлэни үллэстии буолла. Аны эдэр педагогтары кытта өссө биир стратегическай сессияны ыытарга быһаарыстыбыт. Онтон киирбит этиилэри түмэн, программаны суруйан экономическай механизмнарын быһаарсыы күүтүллэр.
Маны сэргэ улуус оҕо хамсааһына “Мэҥэ Кэскилэ” ZOOM платформа нөнүө республикатааҕы оҕо общественнай холбоһуктарын союһун салайааччытын Геннадий Иванович Охлопковы кытта улуус активист оҕолоругар “Наша инициатива – наше будущее” диэн темалаах панельнай дискуссия ыыттылар.
Балаҕан ыйын 15 күнүгэр М. П. Габышев аатынан Балыктаах орто оскуолатыгар пленарнай мунньах буолан ааста. Мунньахха кыттыыны ыллылар улуус баһылыга Старостин Н. П., улуус депутаттарын сэбиэтин бэрэссэдээтэлэ Сазонов П. Д., улуус үөрэҕэрии салалтатын начальнига Черкашина И. В. уонна улуус оскуолаларын уонна оскуола иннинээҕи үөрэхтээһин тэрилтэлэрин салайааччылара. Улуус баһылыга Старостин Н. П. саҥа үөрэх дьыла саҕаламмытынан бэйэтин эҕэрдэ тылын этэн мунньаҕы саҕалаабыта. Ааспыт үөрэх дьылын түмүгүн уонна саҕаламмыт үөрэх дьылыгар туох сыал-сорук турбутун үөрэҕирии салалтатын начальнига Черкашина И. В. билиһиннэрдэ. Ону таһынан бэйэлэрин санааларын этиннилэр улуус депутаттарын сэбиэтин бэрэссэдээтэлэ Сазонов П. Д., улуус үөрэҕириитин профсоюһун бэрэссэдээтэлэ Скрябин И. М. 14 чыыһылаҕа ыытыллыбыт стратегическэй сессия үлэтин түмүгүн билиһиннэрдэ Т. Г. Десяткин аатынан Тумул орто оскуолатын дириэктэрэ Десяткин С. Н., “Мэҥэ Кэскилэ” оҕо хамсааһынын панельнай дискуссиятын үлэтин туһунан билиһиннэрдэ улууспут оҕо хамсааһынын лидера Лиана Попова Аллараа Бэстээх №1 нүөмэрдээх оскуолатын үөрэнээччитэ. Пленарнай мунньах түмүгэр 2 киһи “За вклад в развитие образования Мегино-Кангаласского улуса”, 8 киһи “Почетный работник воспитания и просвещения РФ”, 1 киһи “Благодарность Министерства просвещения РФ”, 7 киһи “Отличник системы образования РС(Я)”, 2 киһи “Почетный ветеран системы образования РС(Я)” , 1 киһи “Учитель учителей РС(Я)”, 1 киһи “За вклад в равзитие дошкольного образования РС(Я)”, 1 киһи “Надежда Якутии” наҕараадалары ыллылар.
Балаҕан ыйын 16 күнүгэр ZOOM платформаҕа 5 хайысханан панельнай дискуссиялар ыытылыннылар. Бу дискуссияларга үөрэх хаачыстыбатын үрдэтии уонна салайыы, иитэр үлэни күүһүрдүү, үөрэхтээһин цифровизациятын тула кэпсэтэһиилэр тэрилиннилэр. Кыттыыны ыллылар: үөрэх хаачыстыбатын кэтээн көрөр киин дириэктэрэ Надежда Герасимовна Попова, Семен Николаевич Донской аатынан үөрэҕирии сайдыытын уонна идэни үрдэтэр институт иитии уонна эбии үөрэхтээһин кафедратын доцена Елизавета Петровна Дуткина, республикатааҕы оҕо общественнай холбоһуктарын союһун салайааччыта Геннадий Иванович Охлопков, Үөрэх хаачыстыбатын кэтээн көрөр киин ГИА-11 отдел салайааччыта Таисия Николаевна Иванова. |