Ытыктабыллаах улууспут олохтоохторо, биир дойдулаахтарбыт!

Баай, дириҥ устуоруйалаах, үтүө үлэһит дьонноох, чаҕылхай талааннаах ыччаттаах тапталлаах дойдубут — Мэҥэ Хаҥалас улууһа төрүттэммит күнүнэн эһигини бука барыгытын уопсастыбаннас, салалта, дьокутааттар Сэбиэттэрин ааттарыттан ис сүрэхпититтэн эҕэрдэбитин тиэрдэбит!

Быйылгы сылы Арассыыйаҕа Дьиэ кэргэн, Саха Өрөспүүбүлүкэтигэр Оҕо саас сыллара биллэриллэн турар, биһиги улууска үс сыллаах Тыа хаһаайыстыбатын иккис сыла салҕанар. Ону тэҥэ улууспутугар үөрэхтээһин тэриллибитэ 150 сылын бэлиэтиибит. Үөрэх хаачыстыбатын үрдэтэргэ, оҕону үлэнэн иитиигэ ураты болҕомтону ууран, оскуола, төрөппүт, уопсастыбаннас, салалта — бары биир сыаллаах-соруктаах, ситимнээхтик үлэлээммит, олоххо ситиһиилээх, төрөөбүт дойдутугар, бар дьонугар бэриниилээх ыччаты салгыы иитэн таһаарарбытыгар эрэнэбит. Үлэни үрдүктүк тутууну көҕүлээн, оҕону эрдэттэн идэҕэ туһаайыыга, дьарыктаах буолууга, саҥа үлэ миэстэтин таһаарыыга кэскиллээх былааннар ылыллан, олоххо киирэллэригэр сыал-сорук туруорунан үлэбитин салгыы ыытабыт.

Улууспут инники кэскилэ, биллэн турар, хас биирдиибит үлэтин түмүгүттэн, түмсүүлээх буолуубутуттан тутулуктаах. Үлэҕэ, үөрэххэ, наукаҕа, култуураҕа, успуорка, тыа хаһаайыстыбатыгар – бары эйгэҕэ үрдүк ситиһиилэрдээх буоларга дьулуһуоҕуҥ. Үтүө үлэһит аҕа көлүөнэ дьоммут хоһуун холобурдарынан оҕолорбутун-ыччаттарбытын иитэр, кинилэр ааттарын үйэтитэр, үлэлэрин-хамнастарын салгыыр, тиһэҕэр тиэрдэр ытык иэстээхпит. Өрүүтүн даҕаны дьулуурбутун холбоон, ситимнээх, түмсүүлээх үлэбитинэн бары харгыстары туоруохпут, хайа да түгэҥҥэ иннибит диэки эрэллээхтик хардыылыыр, элбэҕи кыайар, ситиһэр кыахтаахпыт.

Тапталлаах улууспут сайдыыта хас биирдии олохтоохтон, дьиэ кэргэн, түөлбэ, нэһилиэк олоҕо уйгулаах, инникигэ эрэллээх буоллаҕына эрэ ситиһиллэр. Ол туһугар бука бары түмсүүлээхтик, дириҥ хорутуулаахтык үлэлииргэ-хамсыырга, айарга-тутарга турунуоҕуҥ! Барыгытыгар чэгиэн-чэбдик туругу, ситиһиилээх, таһаарыылаах үлэни-үөрэҕи, эйэлээх халлааны, дьолу-соргуну баҕарабын!

Үүнэ-сайда, чэлгийэ тур, төрөөбүт, тапталлаах улууспут!

Ытыктабылы кытта, улуус баһылыга Дмитрий Тихонов,

улуус дьокутааттарын Сэбиэттэрин бэрэссэдээтэлэ И.И. Андросов