Майаҕа кыра оҕолору көрүү-харайыы, сайыннарыы икки тэрилтэтэ саҥа дьиэлэннилэр. Биирэ ‒ «Сардаана» кыра оҕону сайыннарыы киинэ ‒ оҕо саада уонна биирэ ‒ «Кэскил» кыра оҕолору уйулҕа үөрэҕин сатабылларынан, мэдиссиинэ өҥөлөрүнэн уонна социальнай арыаллааһын киинэ. Уруккута, райпо баарына баттаһа универмаг быһыытынан тутуллан баран, сэбиэскэй тутул ыһыллыаҕыттан, араас атыы-тутуу да барбыт дьиэтэ, билигин Сбербаан киирэн олорор уораҕайын аҥаарыгар кыра оҕолору көрөр-харайар тэрилтэлэр киирбиттэрин үөрүүлээх бэлиэтээһин ахсынньы 22 күнүгэр улуус баһылыга Николай Старостин уонна сэлиэнньэ баһылыга Дмитрий Тихонов кыттыылаах ыытылынна.

Онон, киирии лиэнтэни кырыйыы икки тэрилтэ икки этээһинэн саҥа дьиэлэрэ тэҥҥэ аһыллыыларынан буолла. Лиэнтэни кырыйар чиэс улуус уонна сэлиэнньэ баһылыктарыгар, үөрэх управлениетын начаалынньыгар Ирина Черкашинаҕа, «Сардаана» оҕо саадын бэлэмнээһин бөлөҕүн иитиллээччитигэр Айсан Федоровка тигистэ. Оттон, иккис этээскэ тахсан, саалаҕа алгыс сиэрин-туомун алгысчыт, улуус култууратын биллэр үлэһитэ Спиридон Григорьев – Илгэлээх Испирдиэн толордо.

Николай Старостин саҥа дьиэлэригэр киирбит саҥа сылы көрсө тэрилтэлэр үлэһиттэрин, салайааччыларын эҕэрдэлээн туран, кыра эрдэҕинэ «Сардаана» оҕо саадын иитиллээччитэ этин аҕынна уонна оҕо саадын сэбиэдиссэйигэр Альбина Захароваҕа интерактыыбынай кумах былаһааккатын уонна оҕону арыаллааһын киинин салайааччытыгар Матрена Птицынаҕа проектор сэртипикээттэрин үөрүүлээх быһыыга-майгыга туттартаата. Дьиэни туһааннаах тэрилтэлэр үлэлииллэригэр бэлэмнээн биэрбит бэдэрээтчиккэ ‒ «Стройкомплектсервис» ХЭУо генеральнай дириэктэригэр Руслан Трофимовка уонна бу тэрилтэ сыбааркаһытыгар Сергей Поповка баһылык Махтал суругун туттартаата. Лиисиҥ бэрээдэгинэн Сбербаантан дьиэни атыылаһан ылыы хайдах барбытын кэпсээтэ.

Майа сэлиэнньэтин баһылыга Дмитрий Тихонов инникитин бу дьиэҕэ бүтүннүүтүгэр оҕо саҥата чугдаарарыгар баҕарарын эттэ уонна «Майа ‒ дойдум барахсан» бочуоттаах бэлиэнэн оҕо саадын остуораһын Петр Сидоровы, сэлиэнньэ дьаһалтатын Бочуотнай грамотатынан оҕону арыаллааһын киинин үлэһитин Людмила Скрябинаны өр сыллаах үтүө суобастаах үлэлэрин иһин наҕараадалаата. 30 тыһ. солкуобай суумалаах сэртипикээттэри үөрүүлээх тэрээһин буруйдаахтарыгар анаата.

Үөрэх управлениетын начаалынньыга Ирина Черкашина 2021 сылга улууска үөрэҕирии, кыра оҕону иитии эйгэтигэр барбыт үлэлэри, саҥа оҕо саадтара ситэн-хотон үлэҕэ киллэриллиилэрин санатта. Хас да бэчээт үлэтин толорор тэрил сэртипикээтин «Кэскил» киин салайааччытыгар уонна көмпүүтэр сэртипикээтин оҕо саадын сэбиэдиссэйигэр туттартаан баран, наҕараадаларга киирдэ. «Саха Өрөспүүбүлүкэтигэр оскуола иннинээҕи үөрэҕирии сайдыытыгар кылаатын иһин» бочуоттаах бэлиэни «Сардаана» оҕо саадын үлэһитигэр Акулина Михайловаҕа, оттон, Арассыыйа Үөрэҕириигэ министиэристибэтин Махтал суругун «Кэскил» киин социальнай педагогар Аграфена Леонтьеваҕа туттартаан үөрүүлэрин үксэттэ.

Кини кэнниттэн эҕэрдэлии тахсыбыт, улуустааҕы социальнай бэлиитикэ управлениетын начаалынньыга Ирина Назарова «Кэскил» киин сиэстэрэтигэр Тамара Мохначевскаяҕа управление Бочуотунай грамотатын, туһааннаах тэрилтэлэр салайааччыларыгар сэмэй бэлэхтэрин туттарда, ийэтэ «Сардаана» оҕо саадыгар үлэлээбитин аҕынна.

Төрөппүт кэмитиэтин аатыттан эҕэрдэ уонна махтал тылларын төрөппүт Саргылаана Скрябина эттэ.

Күлүүс тылын Руслан Трофимов саҥа дьиэлэммит тэрилтэлэр салайааччыларыгар туттарда.

Саҥа дьиэлэнии бырааһынньыгын тэрээһинин кырачааннар бэйэлэрэ хоһоон ааҕан, ыллаан киэргэттилэр. «Сардаана» оҕо саадын үлэһиттэрин «Дьүрүһүй» ансаамбыллара хомустар дьүрүһүйэр тыастарын ыалдьыттарга бэлэхтээтэ. Кырыымпалаах кыргыттар кырыымпаларын кыҥкынатан тэрээһини сахалыы тыыннаатылар.

Аркадий Иннокентьев.

Источник: #gazetaerkeii