Алтынньы 16 күнүгэр Майатааҕы И.Г. Тимофеев аатынан лиссиэйгэ «Час науки» чэрчитинэн «Кыраныысса таһыгар үөрэх уонна наука» диэн тиэмэҕэ Юлия Васильевна Иннокентьева, Миссури университетын докторантураҕа устудьуонун кытта скайп-көрсүһүү буолан ааста. Бу көрсүһүүгэ Майатааҕы И.Г. Тимофеев аатынан лиссиэй 9-11 кылаастарыттан 25 үөрэнээччи, Майатааҕы В.П.Ларионов аатынан оскуолаттан 23 үөрэнээччи уонна  Төҥүлүтээҕи А.С.Шахурдин аатынан оскуолаттан кытыннылар. Юлия Васильевна кыра кылаастарга Хатас орто оскуолатыгар үөрэнэр, ол кэннэ авторскай оскуоланы 15 сааһыгар үрүҥ көмүс мэтээлинэн бүтэрэр. Оскуола кэннэ Москва куоракка «РГУ нефти и газа (НИУ) имени И.М. Губкина»устудьуоннуур, иккис үрдүк үөрэҕин Саха сиригэр  кэлэн «Менеджмент» идэтин баһылыыр.

Америкага хайдах тиийбитин, Фулбрайт грант конкурс ирдэбиллэрин, Америка штатыгар олорор сахалары кытта төһө сибээстэһэрин, олохтоохтор кэлии дьоҥҥо сыһыаннарын, ЕГЭҕэ ханнык предметтары  туттарбытын, бастакы тиийэр сылыгар английскай тылын билэр таһымын туһунан  оҕолорго сиһилии кэпсээтэ. Кини биоинформатика диэн идэтин 5 сыл үөрэнэн баһылаан баран Россияҕа контрагынан хайаан да 2 сыл үлэлиэхтээҕин эттэ. Үөрэнээччилэрбит Фулбрайт граҥҥа киирсэргэ  бакалавр үөрэх ирдэнэрин, 1300$ стипендия төлүүллэрин, Миссури университетыгар үөрэнэр кэмҥэ ханнык да үлэҕэ үлэлиэ суохтаахтарын истэн интэриэһиргээтилэр.

Оҕолор араас элбэх  боппуруостарга интэриэһинэй эппиэттэри истэн олуһун астыннылар. Түмүккэ Майа лиссиэйин 11кылааһын үөрэнээччитэ  Сотников Артур английскайдыы баҕа санаатын уонна махтал тылларын эттэ.

Ресурсный центр  «Сайдыс»