Кулун тутар 17 күнүгэр Мэҥэ-Хаҥалас улууһун Майа сэлиэнньэтин “Мичил” оҕону сайыннарар кииннэ «Кырачааннарга тыл ууһун чыпчаала - Олоҥхо» өрөспүүбүлүкэтээҕи оскуолаҕа киириэн иннинээҕи саастаах оҕолор тэрилтэлэрин үлэһиттэригэр аналлаах семинар буолан ааста. Семинарга 58 педагог кыттыыны ылла.
Семинар 3 чааһынан барда. Бастакы чааска семинар тэрийээчилэрэ, Майатааҕы «Мичил» уһуйаан олоҥхоҕо үлэтин, уопутун билиһиннэрдэ, көрдөрдө. Семинар иккис чааһыгар өр сылларга кырачааннарга олоҥхону уһуйбут республика иитээччилэрэ бэйэлэрин үлэлэрин кэпсээтилэр, оҥорон көрдөрдүлэр. Ити кэнниттэн «Мичил» уһуйаан үлэһиттэрэ иллэҥ кэмнэригэр сөбүлүүр дьарыктарын быыстапкаларын тэрийдилэр.
Мастер-кылааска кыттыыны ыллылар, бэйэлэрин уопуттарын атастастылар «Мичил» уһуйаантан Иванова Евдокия Петровна; Дьокуускай куораттан Е.Г. Корнилова аатынан 51 №-дээх «Кэскил» оҕону сайынарар киинтэн Местникова Александра Васильевна, Горохова Сардана Михайловна; Чурапчыттан «Туллукчаан» оҕо сайдар кииниттэн Захарова Ирина Дмитриевна; Хатастан “Кэрэчээнэ” оҕону сайыннарар киинтэн Николаева Галина Семеновна – сэбиэдиссэй, Яковлева Октябрина Андреевна, Никифорова Анна Семеновна, Дьячковская Татьяна Константиновна; Аллараа-Бэстээхтэн “Сказка” оҕо саадыттан Герасимова Мария Егоровна; Төхтүртэн “Мичил” оҕону сайыннарар киинтэн Верховцева Айталина Николаевна, Пермякова Рада Николаевна; Тараттан “Сулусчаан” оҕо саадыттан Соловьева Анна Аксентьевна.
Экспертарынан үлэлээтилэр:
- Попова Галина Семеновна-Санаайа – этнопедагог, Хотугулуу Илин федеральнай университет доцена, культурология кафедратын профессораҤ
- Сысолятина Зоя Григорьевна – Өксөкүлээх Өлөксөй аатынан норуоттар доҕордоһууларын дьиэтин специалиһа;
- Ефимова Диана Гаврильевна – Саха национальнай оскуолаларын үөрэтэр, чинчийэр специалиһа;
- Ядрихинская Февронья Васильевна – үөрэҕи сайыннарар уонна идэни үрдэтэр институт нуучча уонна саха тылларын кафедратын старшай преподавателэ;
- Плотникова Февронья Афанасьевна – Мэҥэ-Хаҥалас улууһун үөрэҕин салалтатыттан, оскуола иннинээҕи саастаах оҕолор отделын салайааччыт;
- Баишева Евдокия Самсоновна – Майатааҕы эбии үөрэхтээһин киинин методиһа;
- Маркова Анна Прокопьевна – педагогическэй үлэ бэтэрээнэ, Саха Республикатын үөрэҕириитин туйгуна, «Дети Саха Азия» фонда степендиата, «Майа дойдум барахсан» бэлиэ хаһаайката.
Түмүккэ, төгүрүк остуол тула түмсэн – биир ситимҥэ киирэн, кэлимник үлэлииргэ, оскуола иннинээҕи саастаах оҕолорго олоҥхоҕо уһуйуу өссө тэнийэн, тарҕатыллан иһэригэр санааларын эттилэр.
|