В.П. Ларионов аатынан Майа орто оскуолатын учуутала Анна Александровна Петухова «Кылаас салайааччыта – 2022» өрөспүүбүлүкэтээҕи күрэххэ «Муҥутуур кыайыылаах» үрдүк ааты ылла.

Үс күннээх хорутуулаах күрэх муус устар 13 – 15 күннэригэр ыытылынна, РФ үөрэхтээһинин бочуоттаах үлэһитин Маргарита Константиновна Петрова сырдык кэриэһигэр ананна. Тэрээһини С.Н. Донской – II аатынан Үөрэх сайдыытын уонна идэни үрдэтэр институт, «Юные Якутяне» өрөспүүбүлүкэтээҕи ресурснай киин, СӨ оҕо общественнай тэрилтэлэрин сойууһун кэлэктииптэрэ иилээн-саҕалаан ыыттылар. Дьүүллүүр сүбэҕэ уопсай үөрэхтээһин, иитии уонна эбии үөрэхтээһин эйгэтигэр судаарыстыбаннай политика Департаменын салайааччытын солбуйааччыта Надежда Захарова, Үөрэх сайдыытын уонна идэни үрдэтэр институт иитии уонна эбии үөрэхтээһин кафедратын сэбиэдиссэйэ Евгения Никифорова, «Юные Якутяне» ресурснай киин методиһа Александр Васильев, Дьокуускай куорат 6 №-дээх оскуолатын дириэктэрин солбуйааччыта, педагогическай наука кандидата Александра Ушницкая үлэлээтилэр.

Кэнчээри ыыччаты иитии, үөрэтии эйгэтигэр айымньылаахтык үлэлии сылдьар, өрөспүүбүлүкэ бастыҥ кылаас салайааччыларын биир түһүлгэҕэ түмпүт күрэххэ 16 учуутал кытынна. Уопуттаах кылаас салайааччылара бэйэни билиһиннэрии, иитии үлэтин бырагырааматын сырдатыы, аһаҕас кылаас чааһын ыытыы, «Кейс-сессия» уопсай үөрэхтээһин тэрилтэлэригэр оҕону иитии, үөрэтии үлэтин сүрүннүүр Судаарыстыбыннай сокуоннары, бырагыраамалары билиини тургутуу түһүмэхтэригэр тус билиилэрин, сатабылларын көрдөрдүлэр.

Түһүмэх аайы сүүмэрдээһини ааһан, финалга биэс бастыҥ кыалаас салайааччыта таҕыста. Кинилэр «Юные Якутяне» өрөспүүбүлүкэтээҕи ресурснай киин дириэктэрин Варвара Васильеваны, Кэбээйи улууһун баһылыгын солбуйааччытын Тимофей Григорьевы кытта аһаҕас кэпсэтиигэ кытыннылар, төгүрүк остуолга оҕону иитии үлэтин туһунан тус санааларын, көрүүлэрин үллэһиннилэр

Үс күннээх дьоһуннаах күрэх түмүгүнэн, В.П. Ларионов аатынан Майа орто оскуолатын 5 «в» кылааһын салайааччыта, аангылыйа тылын учуутала Анна Александровна Петухова «Муҥутуур кыайыылаах» үрдүк аатын ылла. Анна Александровна күрэх уонна кылаас салайааччытын быһыытынан үлэтин туһунан бу курдук санаатын үллэстэр:

 –  В.П. Ларионов аатынан Майа орто оскуолатыгар 2013 сыллаахтан үлэлиибин. Ааспыт үөрэх сылыгар маҥнайгы выпуспун олох киэҥ аартыгар атааран, быйыл саҥа кылааһы ыллым. Кылаас салайааччытынан үлэлиирбин олус сөбүлүүбүн, үөрэнээччилэрбин тус оҕолорум курдук сүрэхпэр чугастык ылынабын. 2021 сылга оскуоланы бүтэрбит кылааһым оҕолоро волонтердуур үлэнэн, фольклорунан бүттүүн дьарыктаммыттара. Бэтэрээннэргэ көмөлөһөрбүт, экологическай акцияларга кыттарбыт, улуустааҕы реаблитицанионнай, «Кэскил» кииннэри кытта көхтөөхтүк үлэлэспиппит. Билиҥҥи кыласпар бу үлэ утумнаахтык салҕанар.

Маннык таһымнаах күрэххэ кыттар олус эппиэтинэстээх уонна долгутуулаах. Кыттааччылар бука бары уопуттаах педагогтар буолан тэрээһин олус тыҥааһыннаахтык, интэриэһинэйдик ааста. Улуустааҕы үөрэх салалтатыгар, оскуолам кэлэктиибигэр, өйөөбүт хамаандабар махталбын тиэрдэбин.

Изабелла Романова