Муус устар 24 күнүгэр Оҕону эбии үөрэхтээһин киинигэр СР үөрэҕириитин туйгуна, «Таммахтар» литературнай холбоһук салайааччыта Августина Семеновна Владимирова Кыайыы 70 сылын көрсө таһаартарбыт «Кинилэр тыыннаахтар» диэн улууспут үөрэнээччилэрин кинигэтин сүрэхтэниитэ буолан ааста. Улуус оскуолаларыттан барыта 60 тахса оҕо, салайааччылар, төрөппүттэр кыттыыны ыллылар. Кинигэҕэ улууспут үөрэнээччилэрэ дьиэ кэргэн матырыйаалыттан, чугас дьоннорун кэпсээннэриттэн сэриигэ охтубут, эргиллэн кэлбит тыыннаах да, суох да аймахтарын туһунан хайдах көрөллөрүнэн, өйдүүллэринэн суруйдулар. Оҕолорбут бу сэмэй үлэлэрин Улуу Кыайыы 70 сылыгар өйдөбүнньүк анаатылар. Кинилэр бүгүҥҥү дьоллоох олох туһугар уоттаах сэриигэ кыргыһан кыайыыны аҕалбыт буойуттар ааттарын түһэн биэрбэккэ, төрөөбүт төрүт тылларыгар, дойдуларыгар харыстабыллаахтык сыһыаннаһан үтүө дьон буолан тахсар сырдык ыра санаалаахтар.