Ирина Черкашина, Мэҥэ Хаҥалас улууһун үөрэҕириигэ салалтатын начаалынньыга:
- Российскай Федерация Президенэ В.В.Путин пресс-конференциятыттан элбэх дьону долгутар ыйытыыларга харданы иһиттибит.
Мин үөрэҕирии тиһигин салайааччытын быһыытынан оҕолорго, дьиэ кэргэҥҥэ, тыа сирин инфраструктуратын сайыннарыыга аналлаах этиилэри болҕойон уонна сэҥээрэн иһиттим. Чуолаан, тыа сиригэр оскуолалары саҥардыы барыахтааҕар тохтоото. Кэлэр сылга биһиги улууспутугар 3 оскуола өрөмүөннэнэрин кэтэһэбит. Оскуолаларга үөрэнэр-үлэлиир усулуобуйаны тэрийии - судаарыстыба уонна муниципалитеттар бастакы уочараттаах соруктара буоларынан маннык дьаһаллар салгыы баралларыгар баҕарабыт.
Билиҥҥи кэм биир көстүүтүнэн сыыппара эйгэтин тэрийии буолар. Сыыппара сервистэрин сайдыыта үөрэҕириини сайыннарар биир механизм буолар. Ол туһунан Президент иккитэ төхтүрүйэн тохтоото. Бу боппуруос тыа сиригэр эмиэ сытыытык турар. Ордук ол Интернет кыаҕын кытта сибээстээх. Биһиги пандемия усулуобуйатыгар дистанционнай үөрэхтээһини тэрийбиппит икки сыла буолара чугаһаата. Ол кэмҥэ оҕолор да, учууталлар да сыыппараҕа компетенциялара үрдээтэ, араас платформалары, сервистэри туттар буоллулар. Ол гынан баран сорох нэһилиэктэрбитигэр Интернет бытаана харгыстары үөскэтэр. Кэтит полосалаах, түргэн Интернет кытыы да сытар нэһилиэнньэлээх пууннарга тиийиэхтээҕэ этилиннэ. «Үөрэҕирии» национальнай бырайыагынан улууспутугар 8 оскуола сыыппара үөрэтэр эйгэтин мадьыалын киллэрэн үлэлииллэр, үүнэр сылга өссө 2 оскуола бу мадьыалга киириэхтээх. Оччоҕуна оҕолор Интернет бары кыаҕын үөрэххэ, билиини ылыыга, бэйэни сайыннарыыга туһанар кыахтаныахтара.
В.В.Путин оҕолоох дьиэ кэргэҥҥэ оҥоһуллар көмө салгыы барыахтааҕар уонна уратыларыгар тохтоото. Кини этэринэн, көмө оҥоһуллар оҕолор саастарыгар араастаһыы баар. Оскуола саастаах оҕолорго көмө оҥоһуллуута үрдүөхтээх диэн эрэннэрдэ. Ол аата, оҕо төрүөҕүттэн 18 сааһын туолуор диэри судаарыстыбаттан өйөбүлллээх уонна харысхаллаах буолуоҕа. Биллэн турар, бу этии төрөппүттэри уюүөрдүбүтэ чуолкай.
Дойдубут бүддьүөтэ социальнай хайысхалаах, ыытар үлэбит дьон туһугар оҥоһуллар диэн санаа Президент В.В.Путин пресс-конференциятыгар итэҕэтиилээхтик иһилиннэ. |