Кэллим-

Кыырыктыйбыт Ильмень күөлгэ,

Кэллим-

Улуу Новгород куоракка…

Дорообо, ытык Ильмень!

Дорообо, сүдү Новгород!

“Улуу Ильмень”- поэма-баллада

Сергей Васильев – Борогонскай

Сэтинньи 11 күнүгэр Мэҥэ-Хаҥалас киинигэр Аллараа Бэстээх бөһүөлэгэр Ильмень күөл кыргыһыытын 19-с хайыһар биригээдэтин буойуттарын Бойобуой Знамятын көрсүү анал тэрээһинэ буолан ааста. Бу хамсааһыны “Эдэр Карбышевецтар” оҕо байыаннай-патриотическай уопсастыбаннай хамсааһын Саха сиринээҕи салаата Улуу Новгород сириттэн аҕалбыттар уонна «Ытык Ильмень устунан» диэн ааттаах 19-с хайыһар биригээдэтин Бойобуой Знамятын улуустары кэрийэ сылдьан кэпсииллэр, оҕолорго көрдөрөллөр эбит.

Тэрээһиҥҥэ кыттыыны ыллылар: Альбина Андреевна Григорьева, Мэҥэ-Хаҥалас муниципальнай тэриллии баһылыгын солбуйааччы, Иван Иванович Колодезников – Уус–Алдан муниципальнай тэриллии улуустааҕы депутаттар сэбиэттэрин бэрэссэдээтэлэ, Гаврил Гаврильевич Тимофеев, Уус–Алдан муниципальнай тэриллии үөрэҕирии управлениятын начальнига, Иннокентий Иннокентьевич Аммосов, Уус–Алдан муниципальнай тэриллии культура управлениятын начальнига, Анна Руслановна Исакова, Мэҥэ–Халастааҕы муниципальнай тэриллии культура управлениятын начальнига, Ирина Михайловна Плотникова, Мэҥэ-Хаҥалас муниципальнай тэриллии үөрэҕирии управлениятын начальнигын солбуйааччы, Михаил Владимирович Дьячковскай, “Эдэр Карбышевецтар” оҕо байыаннай-патриотическай уопсастыбаннай хамсааһын Саха сиринээҕи салаатын көҕүлүүр автора, Чурапчы улууһун Иван Михайлович Павлов аатынан “Килбиэннээх буойуттар” монографическай музей директора, Александр Владимирович Эверстов, Роман Гаврильевич Васильев аатынан Майатааҕы музей научнай сотруднига, Люция Васильевна Бурцева– Уус–Алдан муниципальнай тэриллии пресс-центрын салайааччыта, Ольга Николаевна Павлова – Сергей Степанович Васильев- Борогонскай аатынан – Уус–Алдан муниципальнай тэриллии улуустааҕы библиотека краеведческай отделын сэбиэдиссэйэ, Мария Платоновна Винокурова – Уус–Алдан муниципальнай тэриллии үөрэҕирии управлениятын сүрүн специалиһа, Александр Петрович Сивцев - Сэһэн Аржаков аатынан улуустааҕы краеведчэскэй музей экскурсовода, Николай Владимирович Попов – Мүрү орто оскуолатын «Тускул» байыаннай патриотическай кулуубун салайааччыта ону тэҥэ Мэҥэ–Хаҥалас, Уус– Алдан, Чурапчы улууhун военнай патриотическай кулууб чилиэттэрэ. Көрсүһүүнү иилээн-саҕалаан ыытта Аллараа Бэстээх 2-с нүөмэрдээх орто оскуолатын учууталлара уонна «Факел» байыаннай патриотическай кулууп, салайааччылар Колмакова Ольга Васильевна, Нестеров Андрей Андреевич. 19-с хайыһар биригээдэтин буойуттарын Бойобуой Знамята олунньу 22 күнун кытта сибээстээх. Бу күн – саха норуотугар ураты хомолтолоох, харах уулаах күн. 1943 сыллаахха бу күҥҥэ саха ньургун буойуттара Ильмень күөл алдьархайдаах кыргыһыытыгар үгүстэрэ суорума суолламмыттара. Устуоруйаҕа суруллубутунан “якутские стрелки” диэн ааттанар 19-с хайыһар туспа биригээдэтигэр 597 саха баара. Кинилэр Ильмень күөл илин биэрэгиттэн айаҥҥа туруммуттара. Чараас мууһунан отучча килэмиэтири туораан, соҕуруу кытылга Ретле дэриэбинэни ылан, Стаарай-Русса – Шимск айан суолун быһар сорудах турбута. Хараҥа түүн аҥардас компаһынан эрэ сирдэтинэн тоҥуу хаар устун айаннаан испиттэрэ. Сарсыарда сырдыыта 2-с батальон сэрииһиттэрэ Ретлё дэриэбинэҕэ кимэн киириини саҕалыыллар. 1-кы уонна 3-с батальон улахан аҥара кытылга тиийбэккэ эрэ өстөөх күүстээх уотун анныгар түбэһэллэр. Сүүhүнэн саха саллаата Ильмень күөлгэ олохторо быстар. Бу история туһунан өссө бигэтиилээхтик Эдэр Карбышевецтар Саха Сиринээҕи хамсааһынын көҕүлүүр автора, Чурапчы улууһун Иван Михайлович Павлов аатынан “Килбиэннээх буойуттар” монографическай музей директора Дьячковскай Михаил Владимирович оҕолорго анаан кэпсээтэ. Көрсүһүү түмүгэр 19-с хайыһар биригээдэтин буойуттарын Бойобуой Знамятын Уус-Алдан делегацията Мүрү орто оскуолатын «Тускул» байыаннай патриотическай кулуубун чилиэтэрэ - Сулустан Чагыл-Сырдыктаан Байылыат Уола уонна Максим Винокуров илдьэ бардылар.

Оконешникова И.Я.,

Аллараа-Бэстээх 2 нүөмэрдээх оскуолатын директоры иитэр үлэҕэ солбуйааччы