Алтынньы 29-30 күннэригэр Майаҕа XXXVII-с төгүлүн уочараттаах Илин Эҥэр үөрэҕин үлэһиттэрин спартакиадата Мэҥэ-Ханалас улууһугар үөрэхтээһин тэриллибитэ 150 сылыгар, Арассыыйаҕа Дьиэ кэргэн сылыгар ананан Майа сэлиэнньэтигэр тэрээһиннээхтик ыытылынна. Спартакиада балаһыанньатыгар олоҕуран 10 көрүҥ күрэххэ барыта 200 спортсмен 5 улуустан түмсэн күрэхтэстэстэ. Сүрүн тэрийээччинэн Мэҥэ Хаҥалас, Амма, Таатта, Чурапчы, Уус-Алдан улуустарын үөрэҕин үлэһиттэрин боропсойуустарын комитеттара уонна биииргэ үбүлэһэр үөрэх үлэһиттэрин республикатааҕы комитета буолаллар. 

Бастакы күн хабылык, хаамыска күрэҕэр биһиги улууспут хамаандата эрэллээхтик бастаата, хамаанда салайааччыта Попова Е.Н., остуол тиэнниһигэр уонна Дартс 501 оноҕоһун быраҕыыга бастаан бары улууспут хамаандатын кыттааччыларыгар бастыылларыгар сүрүн олук уурдулар. 2 күн түмүгэр буулдьанан ытыыга, саахымакка бастакы миэстэ, уолаттар волейболга 2-с, дуобакка, кыргыттар волейболларыгар, канат тардыһыытыгар 3-с уонна хапсаҕай күрэҕэр 4-с буолан уопсай 20 очукуолаах Мэҥэ-Хаҥалас улууһун хамаандата бастакы, Уус-Алдан хамаандата 28 очукуолаах иккис, Амма хамаандата 32 очукуолаах үһүс, Чурапчы хамаандата 33 очукуолаах төрдүс, Таатта улууһун хамаандата 37 очукуолаах бэһис буолулар.

Кыратык спартакиада историятын ахтан аастахха Илин Эҥэр 3 улуус үөрэҕин салаатын салайааччылара уонна боропсойуустара: Чурапчы, Алексеевскай, Амма оройуоннара анаан-минээн түмсэн, сүбэлэһэн 1986 сылтан спорт хас да көрүҥэр күрэхтэһэн барбыттара. 1988 сыллаахха улуус хамаандата Аммаҕа тиийэн зачету таһынан кыттыбыта. 1989 сылтан Уус-Алданы кытары холбоһон, ыллыкпытын ыпсаран биэс улуус бары «буруо таһаарарга» кэпсэтии барбыта, онон дьэ үйэлээх олук ууруллубута. Биһиги улууска бу тэрээһин 7-с төгүлүн ыытылынна. 1995 сыллааха Төҥүлүгэ ыытыллан турардаах уонна наар Майа сэлиэнньэтигэр. 2018 сылга Уус-Алдан улууһугар 4-с миэстэ буолан турабыт, 2019, 2022, 2023, 2024 сылларга бастакы миэстэттэн түспэккэ кэллибит.

Быйылгы спартакиада күрэхтэрин кылаабынай судьуйата Захаров А.А., сэкирэтээрэ Куприянова Е.Е. (СК ”Парус”) олус үчүгэйдик судейскай коллегияны салайан ыыттыллар. Биирдиилээн көрүҥнэргэ: хабылыкка-хаамыскаҕа – И.П. Максимов, остуол тенниһигэр – Иванова И.М., Дартс 501 – Кисиляхов В.Н., буулдьанан ытыыга – Тихонова К.В., шашкаҕа – Семенов И.П., шахматка – Цыпандин П.И., волейболга – Попов Г.С., хапсаҕайга – Захаров А.А., канат тардыҺыытыгар – Васильев П.В. судьуйалары салайдылар.

Түгэнинэн туһанан бары үлэлэспит судьуйаларбытыгар, кыттааччылары түһэрбит оскуолаларбыт коллективтарыгар барҕа махтал тылларбытын тиэрдэбит.

Скрябин И.М., Мэҥэ Хаҥалас улууһун үөрэҕин үлэһиттэрин идэлээх сойуустарын комитетын бэрэссэдээтэлэ

Спартакиада түгэннэрин хаартыскаларын манна киирэн көр, хачайдаа