Ахсынньы 15-16 күннэригэр Дьокуускай куоракка маҥнайгы республикатааҕы “ЯРА” турнир ыытылынна. Турнир сыала: оҕолор саха, нуучча, английскай тылларыгар билиилэрин, бодоруһар сатабылларын, айар дьоҕурдарын тургутан көрүү буолар. Күрэх уратыта диэн, хамаандаҕа баар оҕо барыта, учуутала үс тылы тэҥинэн баһылаабыт буолуохтаах. Конкурска Томпоттон, Үөһээ Бүлүүттэн, Намтан, Дьокуускай куорат 2-с, 26-с, 31-с нүөмэрдээх оскуолаларыттан, Физико-техническэй лицейтэн хамаандалар кэлбиттэр. Мэҥэ-Хаҥаластан Ф.Г.Охлопков аатынан Майа орто оскуолатын 6 киһиттэн састааптаах хамаандата кытынна.
Турниры Учууталлар идэлэрин таһымын үрдэтэр институт үлэһиттэрэ салайан, тэрийэн ыыттылар. Күрэх 2-с этабыгар 8 хамаанда тахсан, тыҥааһыннаах киирсии буолла. Визитка, блиц-опрос, фразеологизм, диктант, репортаж, тылдьыты туһаныы, логическай садаача, тылбаас, дуэль, импровизация, библиотекаҕа сорудах уо.д.а. олус интэриэһинэй 18 этаабы ааһан, 1 миэстэни Дьокуускай куорат Физико-техническэй лицейин, 2 миэстэни Нам улууһун, 3 миэстэни Мэҥэ-Хаҥалас улууһун хамаандалара ыллылар. Итини таһынан, Ф.Г.Охлопков аатынан Майа орто оскуолатын 10 “б” кылааһын үөрэнээччитэ Слепцов Алеша “Точность донесения мыслей” номинация хаһаайынынан буолла.
|