Муус устар 4-5 күннэригэр Дьокуускай куоракка бастакы республиканскай саха тылын, литературатын, төрүт культура учууталларын сийиэһэ буолан ааста.

Бастакы сийиэс сахалартан маҥнайгы тыл үөрэхтээҕэ Семен Андреевич Новгородов 125, Алексей Елисеевич Кулаковскай - Өксөкүлээх Өлөксөй 140, норуодунай учуутал Михаил Андреевич Алексеев, Семен Петрович Данилов төрөөбүттэрэ 100 сылыгар анаан оҥоһулунна. 

Сийиэскэ Мэҥэ-Хаҥалас улууһуттан 42 дэлэгээт кыттыыны ылла. Онтон 33 дэлэгээтэ оскуолаларга үлэлии сылдьар саха тылын, литературатын учууталлара.

Бастакы күн А.Е.Кулаковскай - Өксөкүлээх Өлөксөй киинигэр үөрэх уонна наука министирин бастакы солбуйааччытын Ф.В.Габышева дакылаатыттан пленарнай чаас саҕаланна. Уопсайа пленарнай чааска сэттэ дакылаат иһилиннэ. Ону таһынан Ил Түмэн спикера А.Н.Жирков, үөрэх уонна наука миниистирэ В.А.Егоров тыл эттилэр.

Эбиэт кэннэ сэттэ сиринэн хайдан төгүрүк остуоллар буоллулар. (Төрөөбүт тылынан иитии-үөрэтии. Саха тылын билиҥҥи туруга уонна кэскилэ. Саха тылын, литературатын уонна культууратын үөрэтии методиката. Сахалыы үөрэтии хаачыстыбата. Саҥа кэм ирдэбилигэр эппиэттиир учуобуньуктар. Орто анал уонна үрдүк үөрэх кыһатыгар саха тылын, литературатын уонна культуратын үөрэтии. Иитээччини, учууталы бэлэмниир, идэтин үрдэтэр уонна сыаналыыр тиһик: олохсуйбут үгэс уонна сайдар саҕахтар).

Иккис күн эмиэ төгүрүк остуол кэнниттэн иккис нүөмэрдээх бырабыытылыстыба дьиэтигэр сийиэс үлэтин сабыы уонна саха тылын, литературатын уонна культуратын учууталларын ассоциациятын тэрийии мунньаҕа буолла.