Бүгүн, сэтинньи 14 күнүгэр И.Г. Тимофеев аатынан Майа лиссиэйигэр “Росатом Корпоративнай Академия” өйөбүлүнэн инженернэй кылаас уонна «Николаев Киин» СӨ Бастакы Бэрэсидьиэнин М.Е. Николаев архыып-бибилэтиэкэтин, "Оҕо саас лабораторията" тэрилтэ өйөбүллэринэн “Шахматы для всех” бырайыак үөрүүлээх быһыыга арылынна.

Бэлиэ күнүнэн оскуола дириэктэрэ Татьяна Попова, үөрэҕирии салалтатын салайааччыта Гаврил Толстяков, “Саха сирин Үүнэр көлүөнэ пуондата” генеральнай дириэктэрэ Владимир Егоров, “Росатом Корпоративнай Академия” технологическай үөрэхтээһинин дириэктэрэ Екатерина Лукьянова эҕэрдэ тылларын эттилэр, ситиһиилэри баҕардылар. Үөрэнээччилэр ааттарыттан харда тылы 7-ис инженернэй кылаас лиидэрэ Андрей Харитонов эттэ.

Маннык үөрэх эйгэтэ тэриллэрэ үөрэнээччилэргэ сайдалларыгар саҥа кыах, тэтимнээх үйэ идэлэригэр интэриэстэрин үөскэтэрэ уонна инникитин идэлэрин баһылыылларыгар олук буолара саарбахтаммат. Инникитин кэнчээри ыччаппыт олоххо бэлэм, бары өттүнэн сайдыылаах тахсыахтара диэн эрэнэбит.

Бэлиэ күнүнэн оскуола кэлэктиибин уонна үөрэнээччилэрин эҕэрдэлээн туран, саҥа бырайыактар, кыайыылар уонна умсулҕаннаах арыйыылар толору буоллуннар диэн баҕа санаабытын аныыбыт.