Муус устар 13 күнүгэр Майатааҕы «Кэнчээри» оҕону сайыннарар кииҥҥэ иитээччилэргэ анаан СР үөрэҕириитин туйгуна, РФ уопсай үөрэхтээһинин бочуотттах үлэһитэ, 46 сыл педагогическай стажтаах Попова Татьяна Петровна «Глен Доман методикатын туһаныы» диэн авторскай семинар буолан ааста. Семинарга улуус 24 уһуйааннарыттан 46 иитээччи кыттынна, оскуола иннинээҕи саастаах оҕолору иитиигэ – үөрэтиигэ саҥа ньымалары көрдүүллэрин, интириэһиргииллэрин көрдөрдө. Улуустааҕы үөрэҕирии салалтатын начальнигын солбуйааччы Тимофеева В.А., оскуола иннинээҕи саастаах оҕо тэрилтэлэрин отделын начальнига Плотникова Ф.А. кыттыыны ыллылар.
Күн маҥнайгы аҥарыгар Г. Доман методикатын үлэлэригэр хайдах туһаналларын «Кэнчээри» детсад үрдүкү категориялаах иитээччилэрэ Борисова Саргылана Гаврильевна - орто бөлөх, Павлова Лилия Аркадьевна - улахан бөлөх оҕолоругар математикаҕа аһаҕас дьарык ыыттылар. Онтон Татьяна Петровна бэлэмнэнии бөлөх оҕолоругар математикаҕа уонна тыл сайдыытыгар, нуучча тылыгар интегрированнай дьарыгы көрдөрдө. Глен Доман – американскай физиотерапевт, оҕону олох кыра эрдэҕиттэн сайыннарыы методика авторын үлэтин Татьяна Петровна 2008 сылтан ньымаларын биһирээн туттарын, оҕо сайдыытыгар туһалааҕын бэлиэтиир.
Опыттаах иитээччи 46 сыл устата кырачааннарга анаабыт үлэтигэр өрүү саҥа, сонун технологиялары киллэрэр. Ол курдук, «Кэнчээри» уолу, кыыһы эт – хаан өттүнэн эрчийиигэ арааран үөрэтии (гендерное воспитание) программа (1994), «Кыыс оҕону оҕуруонан тигэргэ уһуйуу» (1994), «Дорҕооҥҥо үлэ» (2005), «Саха норуота оҕону иитэр үгэстэригэр олоҕуран оҕо уйулҕатын сайыннарыы» (2006), «Оҕо өйун, тылын сайыннарыыга көмө матырыйаал», «Тыл оонньуута» (2008) уо. д.а методическай көмө матырыйааллар автордара.
Семинар кыттыылаахтара Г. Доман методикатын сонурҕаатылар, оҕолор билиилэрэ киэҥин, таһымнара үрдүгүн бэлиэтээтилэр.
Айымньылаах үлэ үтүө түмүктэрин көрдөрөр авторскай семинар улуус элбэх педагогтарын айар аартыктарын арыйыа диэн, семинар кыттылаахтара санааларын этэн тарҕастылар.
|