Саха чулуу уола, биир дойдулаахпыт, сахалартан бастакы Сэбиэскэй Сойуус Геройа Ф.К. Попов сырдык аатын үйэтитиигэ улууспутугар араас хабааннаах үлэлэр бараллара кэрэхсэнэр. Ааспыт сылга Ф.К. Попов үбүлүөйдээх 95 сылыгар анаммыт бэрт сэдэх бырайыак олоххо киирбитэ. «Герой суолунан»- бырайыак сүрүн ис хоһооно Герой Попов сырдык аатын үйэтитэн, кэлэр көлүөнэ ыччакка патриотическэй тыыны иҥэрии буолар. Ол курдук 2016-2017 үөрэх дьылыгар Геройбут көмүс уҥуоҕа сытар сиригэр Белоруссияҕа улуус бастыҥ лидер оҕолорун сырытыннаран, дуоһуйан-астынан, кырдьык да биһиги биир дойдулаахпыт Саха норуотун Чулуу уола буоларын өйбүтүгэр-сүрэхпитигэр иҥэрэн кэлбиппит.

Быйылгы үөрэх дьылыгар бырайыак салҕанан, улуус оскуолаларын байыаннай-патриотическай кулуубтарын иитиллээччилэрэ, байыаннай-патриотическай «Юнармия» хамсааһын чилиэттэрэ, история олимпиадатын уонна патриотическай ааҕыылар кыайыылаахтара уонна призердара барыахтара. 28 үөрэнээччи ону тэҥэ 2 салайааччы Белоруссия куоракка барар чиэстэннилэр. Бу группаны салайан илдьэ сылдьыахтара: Т.Десяткин аатынан Тумул орто оскуолатын алын кылаас учуутала Васильева Күннэй Егоровна, Майатааҕы лицей ОБЖ предметын учуутала Жирков Дмитрий Леонидович.

Бүгүн, сэтинньи ый 23 күнүгэр Бэстээххэ Олоҥхо дьиэтигэр үөрүүлээх быһыыга оҕолорбутун, салайааччылары атаарыы буолла. Тэрээһин үрдүк таһымнаахтык ааста. Саха омук сиэринэн алгыс тыла этилиннэ, арыылаах алаадьынан айах туттулар. Улууспут Аҕа баһылыгын бастакы солбуйааччыта Павел Данилович Сазонов оҕолорго туһаайан баҕа санаатын эттэ, бырайыак инникилээҕин бэлиэтээтэ, улуус аатыттан бэлэхтэри ыытта. Мэҥэ-Хаҥалас улууһун дьаһалтатын үлэтин сүрүннүүр управление салайааччыта Иван Петрович Птицын бэйэтин эҕэрдэ тылын, санаатын эттэ, кэлэр кэнчээри ыччат инникилээх буоларыгар патриотическай тыыны иҥэриигэ бырайыак оруннааҕын эттэ. Улууспут үөрэҕириитин салалтатын начальнига Ирина Васильевна Черкашина киэҥ туттар киһибит Ф.К. Попов аатын үйэтитиигэ үлэлэһиэхтээхпит, киэҥ туттуохтаахпыт диэн оҕолорго туһаайда. Маны тэҥэ улууспут лидер үөрэнээччитэ Наташа Егорова бэйэтин саастыылаахтарыгар баҕа санаатын эттэ. Бүтэһиккэ группаны салайан илдьэр Майатааҕы лицей ОБЖ предметын учуутала Жирков Дмитрий Леонидович үөрэнээччилэр сэрэхтээх буолууларыгар инструктаж аахта.

Инники эрэллэрбит, кэнчээри ыччаттарбыт этэҥҥэ сылдьан, Герой Попов суолунан сылдьан, хорсун быһыыны оҥорбут сирин көрөн, көмүс уҥуоҕа сытар сирин билэн патриотическай санааны иҥэринэн кэлэллэригэр баҕарыаҕыҥ!