Кулун тутар 27 күнүгэр Аллараа-Бэстээх бастакы нүөмэрдээх оскуолатыгар физкультура учууталларын төгүрүк остуола буолан ааста. Кыттыыны ыллылар: уһуннук араас кэмнэргэ физкультура учууталларынан үлэлээбит убастабыллаах ветеран учууталларбыт, улуус администрациятыттан баһылык солбуйааччыта Птицын И.П., улуус спордун начальнига Брызгалов А.Р., бу көрсүһүүнү тэрийэн, иилээн- саҕалаан көҕүлээбит дьоммут үөрэх управлениятын профсоюһун председателя Андреев С.А., спорт энтузиаһа Илларионов А.П. уонна билигин үлэлии сылдьар физкультура учууталлара.
Бу күн сарсыарда ветеран учууталлары Дьоллоох Дьокуускай куорат спортивнай объектарыгар сырытыннардылар. «Дохсун» футбольнай манеһы көрдүлэр, манна футболу таһынан ох, буулдьа сааларынан ытыыга, аэробиканан, чэпчэки атлетиканан дьарыктыылларын көрдүлэр. Онтон «Чолбон» плавательнай комплексыгар сырыттылар. Дуоһуйа ууга кыһыннары дьарыктана сылдьар оҕолору көрөн үөрдүлэр. «Эллэй Боотур» манеһыгар спортивнай музейы сыныйан көрдүлэр. Манна урукку кэмнэргэ бииргэ күрэхтэспит, табаарыстаспыт киһилэрэ музей директора Кочнев М. бэйэтинэн музейын сырдатта. Элбэҕи биллилэр, саңаны көрдүлэр. Кыһыңңы Сочи олимпиадатын таңаһын, факелын, сувенирдарын көрдүлэр. Сорох стендаларга ветераннарбыт бэйэлэрин эдэр эрдэхтэринэ күрэхтэһэ сылдьалларын көрөн үөрдүлэр. Бириэмэ кылгаһынан махтанан баран А-Бэстээххэ айаннаатылар.
Эбиэт кэннэ А-Бэстээх бастакы нүөмэрдээх оскуолатыгар үлэлэрин үгэнигэр сылдьар улуус учууталларын кытта актовай саалаҕа көрсүстүлэр. Улуус баһылыгын солбуйааччы Птицын И.В. төгүрүк остуол кыттыылаахтарын үөрэхтээһин 140 сыла буолбутунан, Республикаҕа физкультурнай хамсааһын 90 сылынан эҕэрдэлээтэ, уонна бүгүңңү көрсүһүү түмүктээх буоларыгар баҕарда. Онтон улуус управлениятын үөрэҕин специалистара туох үлэ барарын, туох былааннах үлэлии сылдьарбытын сырдаттылар, ветераннар боппуруостарыгар эппиэттээтилэр. Тыл ветеран учууталларга бэриллэн, бэйэлэрэ хайдах үлэлээн ааспыттарын, уруоктарга туох миэтэтинэн үлээбиттэрин, хайдах оҕолорун күрэхтэһиннэрэн ситиһиилэр кэлэллэрин ирэ-хоро кэпсээтилэр. Оҕо доруобуйатыгар закаливаниены таба туһанары, билиңңи кэмңэ харах мөлтөөһүнэ улааппытынан харах зарядкаларын таба туһанары, тыынар органнарга дыхательнай упражнениялары таба туттары кэпсээтилэр. Урукку кэмңэ өрөбүлү аахсыбакка, олохтоох нэһилиэнньэни хабан, төрөппүттэри кытта хайдах үлэлээн ситиһиилэммиттэрин, бары биир киһи курдук көхтөөхтөрүн үөрэн-көтөн туран сырдаттылар. Билигин үлэлии сылдьар учууталларга ситиһиилэри, айымньылаах үлэни баҕардылар.
Ол кэннэ ветеран учууталларга эҕэрдэ сурук уонна «За вклад в развитие физической культуры и спорта» диэн суруктаах спортивнай мэтээллэри үөрэх управлениятын профсоюһун аатыттан председатель Андреев С.А. үөрүүлээх быһыыга-майгыга туттартаата. Ветераннар үөрэн-көтөн, алҕаан, махтанан тарҕастылар. Ветераннарбытыгар доруобайдык, кырдьарга бэриммэккэ чэгиэнник сылдьалларыгар баҕарабыт.
|