61-с төгүлүн ыытыллар «Эркээйи» хаһыат бирииһигэр чэпчэки атлетикаҕа эстафета оскуолалар уонна нэһилиэктэр икки ардыларыгар күрэхтэһии 1 маайга, Майа нэһилиэгэр Баһылай Манчаары аатынан стадиоҥҥа ыытылынна. Күммүт - дьылбыт быстах тыаллаах, хаардаах буолан биэрдэ. Ону ол диэбэккэ күрэхтэһии былаан быһыытынан этэҥҥэ түмүктэннэ. Күрэхтэһии саҕаланыытыгар улууспут баһылыга Старостин Николай Прокопьевич, «Эркээйи» хаһыат редактора Докторова Алена Викторовна, спортсменнары, көрө кэлбит ыалдьааччылары эҕэрдэлээн туран инники өттүгэр ситиһиилэри, кыайыылары баҕардылар.
Оскуола оҕолорун икки ардыгар сэттэ хамаанда кытынна. Оҕолор балаһыанньа быһыытынан 12 этапка сүүрдүлэр. 1 этап 600 м. кыыс стартыыр, 2 этап 200 м уол, 3 этап 200 м. кыыс, 4 этап 200 м. уол, 5 этап 400 м. кыыс,6 этап 200 м. уол, 7 этап 200 м. кыыс, 8 этап 400 м. уол, 9 этап 200 м. кыыс, 10 м. 200 м. уол, 11 этап 200 м. кыыс, 12 этап 600 м. уол фиништаата. Сэттэ хамаанда стартка тэҥҥэ түһэн күрэхтэһии тыынын күүрдэн, сүүрүү бүтүөр дылы кэккэ оскуолалар илин кэлин түсүһэн, бүтэһик финишка дылы ким бастыыра биллибэккэ барда.
Уопсай хамаанданан түмүккэ, финишка бастакыттан бастаан испит Майатааҕы лицей хамаандатын ситэн Майа В.П. Ларионов аатынан орто оскуола оҕолоро бастакы миэстэни 9 мин. 52 секунда 08 дэһээтэйинэн кэлэн бастаатылар (учууталлара Брызгалов Д.Н., Прохоров И.И.), 2 миэстэ Майатааҕы лицей хамаандата ылла - 9, 53, 94 (учууталлара Петров П.О., Хабаров Г.П.), 3 миэстэҕэ өр кэмҥэ миэстэлэспэтэх Төнүлү А.С. Шахурдин аатынан орто оскуолатын үөрэнээччилэрэ таҕыстылар 10, 04, 16 (учуутал-тренер Кисиляхов В.Н.). Кыайыылаахтары «Эркээйи» хаһыат редактора Докторова Алена Викторовна, улуустааҕы спорт уонна физкультура начальнига Брызгалов Александр Романович өйдөбүнньүк мэтээлинэн, грамотанан, кыайыылаах кубогынан үөрүүлээх быһыыга - майгыга наҕарадалаатылар.
|