«Дьиэ кэргэн эйгэтэ» конференция.
Алтынньы ый 2 күнүгэр Лоомтукаҕа улуустааҕы төрөппүттэр конференциялара 180-ча төрөппүтү, иитээччини, учууталлары түмтэ. Нэhилиэк кулуубун киэҥ уораҕайыгар кэлбит дьону олохтоох оскуола учууталлара, үөрэнээччилэрэ сахалыы алаадьынан уруйдуу көрүстүлэр. Бу конференцияны улуус дьаhалтата уонна үөрэх управлениета иилээн-саҕалаан, тэрийэн ыыттылар. Конференция ыалдьыттарынан дьиэ кэргэн педагога, Россия уонна Саха сирин журналистарын Сойууhун чилиэнэ Любовь Семеновна Аргунова, пединститут преподавателэ, пед.наука кандидата, психолог Ушницкая Александра Егоровна уонна Саха сирин норуот педагогикатын Ассоциациятын салайааччыта Кондаков Иван Иванович буоллулар.
Социальнай боппуруостарга улуус Баhылыгын солбуйааччы Иван Петрович Птицын конференцияны аста, үөрэх управлениетын начальнига Ирина Васильевна Черкашина үөрэх-иитии эйгэтигэр турар проблемалары олус чуолкайдык сырдатта, төрөппүттэн туох ирдэнэрин бэлиэтээтэ. Ол кэнниттэн тыл Л.С.Аргуноваҕа бэрилиннэ. Кини дьиэ кэргэҥҥэ оҕону иитиигэ элбэх кинигэ ааптара, Саха сирин төрөппүттэрэ, иитээччилэрэ билэр, күүтэр киhилэрэ. Бу да сырыыга Любовь Семеновна бэрт үгүhү кэпсээтэ, саҥа кинигэ кэhиилээх кэлэн дьон болҕомтотун тарта. «Искусство быть родителем» («Төрөппүт буолуу ис күүhэ») кинигэ сүрэхтэниитэ олус сэргэхтик ааста.
Кэлбит ыалдьыттар актовай лекцияларыттан элбэх туhалаах сүбэлэри, саҥа билиини үгүс төрөппүт ылла.
Күн иккис аҥарыгар оскуола дьиэтигэр саҥа технологиялар быыстапкалара уонна 5 секциянан үлэ тэрилиннэ: «Чөмчүүк саас уратыта», «Саhарҕа саастан саҕалаан», «Тымтык саас өйдөбүлэ», «Киэҥ аартыкка атаарыы», «Оҕо харах далыгар». Улуус дьаhалтатын уонна үөрэх управлениетын специалистара, методистар, музыкальнай оскуола, «Кэскил» киин, поликлиника, полиция үлэhиттэрэ секцияларынан сылдьан иhитиннэрии оҥордулар, санаа атастаhыытыгар кытыннылар.
Бастакы секцияҕа 24 киhи кытынна. Дьокуускай куорат «Солнышко» детсадын методиhа Дедюкина Люция Ильинична дьиэ кэргэҥҥэ оҕону иитиигэ бэйэтин кистэлэҥнэриттэн быhа тардан кэпсээбитэ сэҥээриини ылла.
Иккис секция5а 19 киhи үлэлээтэ. Аргунова Л.С. дьоллоох дьиэ кэргэн туhунан кэпсээнэ уонна специалистар ыйытыктарга эппиэттэрэ дьон болҕомтотун тарта.
Үhүс секцияҕа 36 төрөппүт уонна учуутал сырытта. Үс оҕо ийэтэ, библиотекарь идэлээх Дьяконова Ольга Николаевна «Кэскил дьиэ кэргэҥҥэ түстэнэр» диэн темаҕа бэйэтин дьиэ кэргэнин опытыттан кэпсээбитэ олус итэҕэтиилээх буолла. Оҕо уонна төрөппүт икки ардыгар истиҥ сыhыан, итэҕэйсии хайаан да наадатын, төрөппүттэр бэйэ-бэйэлэригэр сыhыаннарынан оҕону иитэллэрин, дьиэ кэргэҥҥэ барыта тапталынан эрэ туругурарын кэпсээни истибит дьон бары итэҕэйдэ.
Төрдүс секцияҕа 16 киhи кытынна. Манна Кондаков И.И аныгы кэмҥэ хайдах киhи ситиhиилээх буоларын уонна оннук киhини хайдах иитиэххэ сөбүн туhунан киэҥ кэпсэтиини таhаарда. Төрөппүттэр Куприянова У. И. (Чыамайыкы), Местникова А.Н. (Матта) дьиэ кэргэҥҥэ улахан кылаас оҕолорун иитии уратыларын туhунан санааларын атастастылар.
Бэhис секцияҕа 36 киhи сырытта. Манна кэпсэтии оҕону иитиигэ түөлбэ үлэтин туhунан буолла. Сүнньүнэн, түөлбэ начальниктара, социальнай педагогтар кыттыыны ыллылар. Түөлбэҕэ оҕону кытта үлэ араас көрүҥнэрин А.М.Борисова (Павловскай), М.И.Сидорова, Л.М.Николаева (Төҥүлү), М.Д.Яковлева (Бэдьимэ), Н.В.Иванова, В.П.Стручкова (Бүтэйдээх) у.д.а. билиhиннэрдилэр. «Полярная звезда» сурунаал эппиэттир секретара, Россия суруйааччыларын Сойууhун чилиэнэ Ираида Гаврильевна Попова «Чолбон» сурунаал дьиэ кэргэни түмэр суолаталааҕын ылыннарыылаахтык бэлиэтээтэ. Түмүккэ секция кыттыылаахтара улуус таhымыгар түөлбэ үлэтин сааhылааhын, түөлбэ начальниктарын өйөөhүн наадатын, улуустааҕы киини тэрийии, түөлбэни оскуолаларга сыhыарыы, улууска түөлбэ конференциятын ыытыы, оҕо иитиитигэр бастыҥ үлэлээх түөлбэлэргэ Грант олохтооhун, дьиэ кэргэн педагога диэн идэҕэ үөрэттэрии, социальнай педагог хамнаhын үрдэтэри съездкэ туруорсуу курдук этиилэри биир санаанан ылыннылар.
Киэhээҥҥи пленумҥа конференция кыттыылаахтара үөрүүлээх быhыыга-майгыга наҕараада ылбыт төрөппүттэри эҕэрдэлээтилэр, секцияларынан иhитиннэрии ыытылынна уонна конференция уурааҕа ылылынна. Бу конференцияҕа киирбит этиилэр олоххо киирдэхтэринэ оҕо иитиигэр олус көмөлөөх буолуо диэн эрэл санаа хас биирдии кыттааччы санаатыгар уйаланна.
Евдокия Егорова –
Тыыллыма оскуолатын учуутала
|