Үтүөнү, үйэлээҕи оҥорбута.

Саха АССР оскуолаларын үтүөлээх учуутала Георгий Михайлович Сергучеву кытары үлэбинэн алтыһан ааспыт дьоллоохпун. Кини «История развития образования Мегино-Кангаласского улуса Республики Саха (Якутия)» дьоһун үлэни уһун сылларга дьаныһан туран дьарыктанан, 1997 – 1998 сс. олохтоох типография көмөьүнэн таһаартаран дьоҥҥо-сэргэҕэ, үүнэр көлүөнэ ыччакка умнуллубат бэлэх оҥорбута. «Бэйэбэр сыал-сорук туруорунан, 40-ча сыл тухары архыыптары хасыһан, үлэлэстим», - диэн кэпсиирэ. Түмүгэр хас биирдии оскуола устуоруйата чуолкайдаммыта, мөккүөрдэр, хайдыһыы тохтообута. Ол кэмнэргэ үөрэх салаатыгар методическай кэбиниэти салайан олорорум. Биһиэхэ кэлэн элбэхтик бэлиэтэнэрэ, матырыйаалы хасыһара, ардыгар сорудах биэрэн барара. Георгий Михайлович олох араас уустук кэрдиис кэмин эрэллээхтик дабайан кэлбит киһи. Тыһыынчаттан тахса оҕолоох Майа орто оскуолатын, оройуоҥҥа үөрэх салаатын салайбыт уопуттаах, сатабыллаах салайааччы, биллиилээх-көрүүлээх, сайдыылаах педагог. Киһи быһыытынан кыыһыра-тымта сылдьыбат киэҥ-холку, судургу буолара. Таҥаһа-саба ырааһа, ис иһиттэн чэбэрэ харахха быраҕыллара. Араас пуорумнарга, түмсүүлэргэ, дьон-сэргэ ортотугар ыллыктаахтык, ылыннарыылаахтык саҥарара, санаатын чуолкайдык тиэрдэрэ. Саҥаны олоххо киллэриигэ хайаан да этиилээх буолара. Оройуон хаһыатыгар сотору-сотору ыстатыйалара тахсаллара. Ордук «Уолу, кыыһы арааран үөрэтии» боппуруостарыгар этиилэрин сэҥээрэ аахпыппын өйдүүбүн. Улуу Кыайыы бырааһынньыктарыгар Ийэ дойду көмүскэлигэр саа-саадах тутан сэриилэспит буойун учууталларга аналлаах ыстатыйалары «Ленинскэй знамя» хаһыакка бэчээттэтэрэ. 2014 с. улууска үөрэхтээһин 140 сылыгар анаан кинигэтин, аныгы үйэ сайдыытыгар сөп түбэһиннэрэн, «Сахаада» издательствотыгар 500 ахсаанынан саҥаттан бэчээттэппитим. 1997 с. тахсыбыт кинигэтин ис хоһооно уларыйбакка бэчээттэммитэ.

Георгий Михайлович учуутал, салайааччы, үөрэхтээһин устуоруйатын дириҥник үөрэппит педагог быһыытынан оройуон устуоруйатыгар умнуллубат үтүөлээх. Кини көлүөнэ ыччакка сырдык сулус буолан үтүө аата-суола ааттана туруоҕа.

Степан Андреев, педагогическай үлэ бэтэрээнэ.