Бүгүн, ахсынньы 8 күнүгэр, сахалартан бастакы Сэбиэскэй Сойуус Дьоруойа Федор Кузьмич Попов төрөөбүт күнэ. Майа оскуолаларын үөрэнээччилэрэ, Майа дьаһалтатын, улуус бэтэрээннэрин сэбиэтин, боевой дьайыылар кыттыылаахтарын кытта Майа сэлиэнньэтигэр Дьоруой памятнигар сүгүрүйүү бэлиэтин уурдулар.

Федор Кузьмич Попов 1921 сыл ахсынньы 8 күнүгэр Баатара нэһилиэгэр төрөөбүтэ. Аҕа дойду Улуу сэриитигэр 1943 сыл алтынньы 1 күнүгэр Днепр өрүһү туораан Глушец дэриэбинэ таһынааҕы кыргыһыыга көрдөрбүт хорсун быһыытын иһин Сэбиэскэй Сойуус Дьоруойун аата иҥэриллибитэ.

Ахсынньы 1 күнүттэн 10 күнүгэр дылы Саха Өрөспүүбүлэкэтигэр Дьоруой күнүгэр аналлаах декада буола турар. Мэҥэ Хаҥалас үөрэҕириитин тиһигэр сылын аайы патриотическай иитии чэрчитинэн "Снежный барс" Сэбиэскэй Сойуус Дьоруойа Федор Кузьмич Поповка анаммыт улуустааҕы күрэх ыытыллар.