2019 с. ахсынньы 7 күнүгэр Балыктаах орто оскуолата төрүттэммитэ 75 сыллаах үбүлүөйүн бэлиэтээтэ. Бэлиэ күнү көрсө билии кыһатыгар биир дойдулаахтара, дьоһун киһи, өрөспүүбүлүкэҕэ киэҥник биллэр уопсастыбаннай, политическай уонна судаарыстыбаннай деятель, тыыл бэтэрээнэ, сүҥкэн салайааччы Михаил Прокопьевич Габышев аата үөрүүлээх быһыыга-майгыга иҥэрилиннэ.

Оскуолаҕа ааты иҥэрии үөрүүлээх чааһыгар республика, улуус салайааччылара, депутаттар, М.П.Габышев оҕолоро, сиэннэрэ, бииргэ төрөөбүттэрэ, ону сэргэ араас сылга үлэлээн ааспыт учууталлар, выпускниктар, оскуола оҕолоро кэлэн кыттыыны ыллылар. М.П. Габышев бииргэ төрөөбүт балта, Балыктаах орто оскуолатын ытыктанар ветеран учуутала П.П. Габышева долгуйан туран тыл эттэ, Габышевтар күтүөттэрэ, Ил Түмэн мунньаҕын депутата Ю.П. Баишев "М.П. Габышев аатынан стипендияны" нуучча тылын уонна литературатын учууталыгар А.Н. Говороваҕа, 10 кылаас бастыҥ үөрэнээччитигэр Валя Кычкинаҕа туттарда.

Үбүлүөй үөрүүлээх чааһын аһыллыытыгар саха тылын уонна литературатын учуутала К.Н. Цыпандина айан суруйбут оскуола өрөгөй ырыата сүрэхтэнэн, биһирэбили ылла. Оскуола директора А.М. Мохначевская үбүлүөйү көрсө коллектив барыта турунан үлэлэспит оскуола 75 сыллаах историятын кэрэһэлиир кинигэ тахсыбытын иһитиннэрдэ. Араас сылларга үлэлээбит, үлэлии сылдьар ветераннар, учууталлар, педагогтар, үлэһиттэр ситимнээх, сыралаах үлэлэрин сыаналыыр наҕараадаларынан бэлиэтэннилэр. Ыалдьыттары «Ыллыкчаан» оҕо көрдөрүүлээх үҥкүү ансаамбыла, “Дуораан” ырыа ансаамбыла, “Тыл хоһууна” хоһоонньуттар эҕэрдэлээтилэр.

Дьэ ол кэннэ оскуола кынат үүннэрэн олох суолугар көтүппүт выпускниктара сылларынан парадтаан киирдилэр. 1964 сыллааҕы выпустар ааспыт сайын кылаас 24 оҕотун хас биирдиитин аатыттан сирень маһы олордубуттара. Сирень үүнээйини Балыктаах оскуолатын 7 кыл. үөрэнээччитэ Алик Гоголев сайын устата бүөбэйдээбит. Бэйэтин баҕатынан көрбүт-истибит Аликка махтанан, бу выпускниктар планшет бэлэхтээтилэр. Итини сэргэ бары выпустар үбүлүөйдээх күнүнэн оскуолаларын, маҥнайгы учууталларын, кылаастарын салайааччыларын эҕэрдэлээтилэр, үөрэн-көтөн бэлэхтэрин туттардылар.  

Кэлбит салайааччылартан депутаппыт А.Н. Жирков саҥа оскуола тутуллуута бырайыакка киирэригэр үлэлэспит үтүөлээх Романов Александр Афанасьевиһы аатын ахтан туран, саҕаламмыт үлэ тэтимигэр болҕомтону уурарга, саҥа үөрэх дьылыгар үлэҕэ киирэригэр баҕа санаатын эттэ. Хас биирдии выпускник ити баҕа санааны бигэргэтэн, оскуола инники сайдыытыгар, үлэтигэр-хамнаһыгар бары үтүөнү эттилэр, алгыстарын анаатылар.

Ити курдук коллектив үбүлүөйүн өрө көтөҕүллэн көрүстэ, салгыы өссө да биир сыалга түмсэн, соруктары туруорунан, сардаҥалаах сарсыҥҥыга, үтүмэн үлэҕэ, саҥа саҕахтарга ылсарга бэлэмин биллэрдэ.

Балыктаах орто оскуолата