Кулун тутар  24 күнүгэр, Н.В.Петров аатынан Дьабыыл орто оскуола базатыгар “Агротехнологическай үөрэхтээһин нөҥүө үөрэнээччилэри тыа хаһаайыстыбатын үлэтигэр уһуйуу” диэн темаҕа агрооскуолалар республикатааҕы семинардара ыытылынна. Географията киэҥ – 19 улуустан: Үөһээ Бүлүүттэн, Чурапчыттан, Уус-Алдантан, Уус-Маайаттан, Дьааҥыттан, Муоматтан, Кэбээйиттэн, Абыйтан, Амматтан, Тааттаттан, Томпоттон, Хаҥаластан, Намтан, Ньурбаттан, Сунтаартан, Горнайтан, Өлүөхүмэттэн, Уус-Тааттаттан уонна бэйэбит улууспутуттан 45 оскуола кытынна. Барыта 245 кыттааччы опыт атастаста. Ыҥырыылаах ыалдьыттар СР Үөрэҕин Министерствотын уопсай үөрэхтээһин салаатын сүрүннүүр специалиһа Сивцева М.В., Агротехнологическай үөрэхтээһин Экологияҕа уонна Туризмҥа Республикатааҕы Киинин директора Данилова С.С., директоры солбуйааччы Карамзин В.Е., лаборатория сэбиэдиссэйэ Захаров Е.А., республика агрооскуолаларын союһун толорооччу  директора Жирков Н.С., үөрэх улуустааҕы Управлениятын методистара, инспектордара семинары салайдылар. Улуус баһылыгын солбуйааччы Потапов С.С., тыа хаһаайыстыбатын улуустааҕы Управлениятын начальнигын солбуйааччы Петров Д.Д. семинар үлэтигэр бэйэлэрин сыанабылларын,  агрооскуолалар сайдыыларын инники хайысхаларыгар санааларын эттилэр.

        Семинар үөрүүлээх аһыллыытын түмүгэ оскуола коллективын уонна “Кустукчаан” оҕо вокальнай ансамблын, уопсайа 60 киһилээх хор агрооскуола гимнин толорон ньиргитиитэ тэрээһин кыттыылаахтарын биһирэбилин ылла.

        Семинар практическай чааһыгар олохтоох оскуола  13 учуутала аһаҕас уруоктары, 4 маастар-кылааһы, агрокомпоненнары хайдах киллэрэллэрин көрдөрдүлэр. Кылаас таһынааҕы дьарыкка ФГОС ирдэбилинэн  2-с кылааска “Физика оонньуунан”, “Иппотерапия” дьарыгы оскуола мед.үлэһитэ Баишева М.Е., черчение учуутала Петров В.Д., производственнай үөрэхтээһин маастара Попов С.П., үөрэнээччи Попов Вася ыыттылар.

        Республиканскай таһымнаах буолан уһулуччулаах педагог Макаренко А.С. Аан дойдутааҕы конкурсун республиканскай түһүмэҕэ манна ыытылынна. Барыта 10 оскуола күөн көрсүһэн буста-хатта, тыҥааһыннаах түгэни эрийсиилээхтик ааста. Конкурс түмүгүнэн сүүмэрдиир түһүмэх кыайыылааҕа Чурапчы улууһун Дириҥ орто үөрэхтээһин оскуолата буолла, директор Попов Дмитрий Иванович, II-с миэстэни Сунтаар улууһун Куоукуну орто үөрэхтээһин оскуолата, директор Иванов Николай Андреевич, III-с миэстэни Таатта улууһун Н.Д.Неустроев аатынан Уус-Таатта орто үөрэхтээһин оскуолата, директор Дягилев Петр Гаврильевич ылан үөрдүлэр-көттүлэр. Бу оскуолалар үһүөн сотору Краснодарскай кыраайга буолар ХII-с А.С.Макаренко аатынан Аан дойдутааҕы конкурска Саха Республикатын аатыттан кыттар быраабы ыллылар.

        Салгыы республика агрооскуолаларын союһун толорооччу директора Жирков Н.С., Үөрэх министерствотын уопсай үөрэхтээһин салаатын сүрүннүүр специалиһа Сивцева М.В., агротехнологическай үөрэхтээһин ЭТРК директора Данилова С.С. оскуола директордарыгар Төгүрүк остуолу ыытан, үүннээх-тэһииннээх соруктары туруордулар. Төгүрүк остуол  үлэтин түмүгүнэн агрооскуолалар директордара маннык этиилэри киллэрдилэр: 15% оннугар агропрофиль штатнай единицатын киллэрэргэ; материальнай – техническэй базаны бөҕөргөтөргө; тыа хаһаайыстыбатын идэлэригэр лицензияны, сир учаастагын тыырыытын; үөрэнээччилэр производственнай үлэҕэ кыттыыларын; СХПК уонна оҕо кооперативтарын үлэлэрин тэрийиини уо.д.а.

        Маннык кэрэ сааскы ылааҥы күн семинар кыттыылаахтара бука бары оскуола стационарнай лааҕырын “Чаачыгый” сайылыгар тиийэн саҥалыы титииги, оҕолор олорор, сынньанар кэрэ көстүүлээх дьиэлэрин астына көрдүлэр-иһиттилэр.

Сааскы саймаархай салгынынан сайа тыынан, сокуолабыт үлэһиттэрэ сыа-сым курдук бэлэмнээбит шашлыктарын тото-хана сиэн, айылҕа кэрэ көстүүтүн хаартыскаҕа туһэрэн, киинэҕэ устан дуоһуйа сынньаннылар.

        Семинар практическай чааһыгар кыттыбыт учууталларга сертификат туттарылынна. Түмүккэ наҕараадалары туттарыы долгутуулаах түгэнэ барыбытын үөртэ: олохтоох оскуола алын кылааһын учуутала Курчатова Татьяна Гаврильевнаҕа СР Үөрэҕин министерствотын “ СР Үөрэҕин туйгуна”, директоры иитэр үлэҕэ солбуйааччы Протодьяконова Екатерина Васильевнаҕа “Саха сирин инники эрэлэ” бэлиэ оскуола тракториһа Баишев Егор Николаевич СР тыатын хаһаайыстыбатын Министерствотын Бэлиэ Знактаах Бочуотунай Грамотаны, суоппар Березкин Прокопий Иннокентьевичка, оскуола старшай бухгалтера Матвеева Мария Константиновнаҕа , старшай повар Калачева Евдокия Гаврильевнаҕа Бочуотунай Грамоталар туттарылыннылар.

        Ыалдьыттарбытын сахалыы сиэринэн сандалынан күндүлээн, ыраахтан айаннаан кэлэн үлэлэрин уопутун үллэстибиттэригэр махтанан туран, айыимньылаах үлэлэригэр үрдүк үрдэллэри баҕаран атаардыбыт.

Семинар кыттыылаахтара түмүк этиилэригэр оскуола коллектива бука бары учууталлыын, техүлэһиттэрдиин, салайааччылыын биир киһи курдук түмсэн үлэлиирбитин бэлиэтээн, өссө бары оҕолордуун бары биир көрүҥнээх көстүүммүтүн биһирээн, чуолаан директорбытыгар Любовь Васильевнаҕа махтанан, өрүү маннык олохтоммут үтүө үгэспит сайда турарыгар ис сүрэхтэн баҕарбыттара махталлаах.