Үгэс буолбут сылын аайы ыытыллар оскуола иннинээҕи саастаах оҕолорго анаммыт «Окно в науку» научнай чинчийэр ааҕыылар Ороссолуода орто оскуолатын оскуола иннинээҕи сүһүөҕүн “Күнчээн” уһуйааныгар, үһүс сылын кэтэхтэн (заочно) ыытыллан ситиһиилээхтик түмүктэннилэр.

Оҕолор дакылааттарын видеонан устан, аныгылыы сиэринэн *Ютуб*, *Гугл диск* электроннай сыһыарыыларга угуллан, ссылкалар нөҥүө компьютерга, планшетка, телефоҥҥа көрүллэр саҥа ньыма үөскээн, үлэлииргэ, дьүүллүүр сүбэ сыаналыырыгар олус табыгастаах диэн бэлиэтиибит. Стендовай дакылаат ирдэбилэ:

• Дакылааттар стендовай, аныгы технологиянан оҥоһуллубут, оҕо көрөн кэпсииригэр анаммыт, атын оҕолор көрөллөрүгэр табыгастаах, өйдөнүмтүө буолаллара балаһыанньанан ирдэнэр.
• Аҕыйах суруктаах буолон сөп.
• Хаартыскалара, ойуулара улахан, биир слайдаҕа биир эбэтэр икки буолуон сөп. Элбэх хаартыскаҕа оҕо буккуллар, долгуйан ыһыллан хаалыан сөп.
• Уһуйаан иитиллээччитэ өссө ааҕа илик оҕоҕо суругун оннугар диаграмма, мнемотехника карточкалара туһаныллыан сөптөөх.

Бу ирдэбиллэргэ быйылгы сылга сорох презентациянан дакылааттар эппиэттэспэттэрин чопчулаан этэбит, бэлиэтиибит. Видеоҕа устуу буолан дакылаат ис хоһооно чуолкайдык көстөр буолуон наада, кэлэр сылга иитээччилэр маны учуоттуулларыгар сүбэлиибит.

Дакылааты бэлэмнииргэ эрдэттэн стендовай дакылаатынан кэпсииргэ үөрэммит оҕо, дакылаатын хаамыытын, этаптарын барытын тутуһан кэпсииргэ, сирдэтинэргэ үөрэнэр. Стендовай дакылаат, оҕо дакылаатын уопсай ис хоһоонуттан чопчу сааһыланан, хаамыытын барытын кэпсииригэр, инникитин атын да ылсар улэтигэр сааһыланар, толкуйдуур үөрүйэҕин сайыннарара саарбаҕа суох.

Презентацияҕа оҥоһуллубут дакылааттар улахан экраҥҥа көстөр буолан кэпсииргэ, сааһылаан оҥорорго да табыгастаах гынан баран, оҕо дакылаатын уопсай тутулун билбэт, дакылаатын уопсай хартыынатын барытын көрбөт буолан биирдии эрэ слайданан салайтаран бэлэмнэнэр. Оннук оҥоһуллубут дакылааты арыычча улахан форматка (А-3) оҥорон бэчээттэтэн таһаартарар ордук дии саныыбыт.

Дакылааттар сүрүннээн балаһыанньа быһытынан агрономическай уонна экологическай хайысханан буоллулар. Иитээччилэр олус интэриэһинэй, араас хабааннаах актуальнай темалары талан иитиллээччилэрин бэлэмнээбиттэр. Оҕолор дакылаат эрэ аахпакка, практическай, исследовательскай үлэлээхтэрин өрө көтөхтөрүүлээхтик, киэн тутта  кэпсииллэриттэн олус үөрдүбүт, көрөн дуоһуйдубут. Республикабытыгар, Россия иһинэн ыытыллар дакылааттарга кэтэхтэн кыттыга иитээччилэр оҕолору нууччалыы кэпсииргэ үөрэтэн кытыннараллара олус үчүгэй буолан баран, билиҥҥи кэмҥэ сахабыт тыла симэлийэн сүппэтин туһугар оҕолорго дакылааты төрөөбүт төрүт тылларынан кэпсииллэригэр инникитин үлэлэһиэххэйин диэн ыҥырабыт. Төрүт тылын билэр, саҥарар оҕолору иитэн таһаарар уһуйаан иитээччилэрэ, билиҥҥи ИКТ технологиялар сайдыбыт кэмнэригэр, биир сүрүн сыалбыт сорукпут буолар. Төрөппүттэргэ өйдөтөн, сүбэлээн бииргэ үлэлэһэн сорукпутун ситиһиэгин.

Быйылгы сылга дакылаат ааҕыытыгар учугэй, чаҕылхай бэлэмнээхтэрин Аллараа Бэстээхтээҕи “Сказка”, Чүүйэтээҕи “Чэчир”, Харатааҕы “Кэрэчээн”, Павловскай “Лена” уһуйааннар, Майатааҕы “Кэнчээри”, Төхтүрдээҕи “Мичил”, Төҥүлүтээҕи “Олимпионик” оҕону сайыннарар кииннэр көрдөрдүлэр.

Атын улуустартан кыттыы аҕыйаҕын бэлиэтиибит, инникитин балаһыанньа эрдэттэн республика улуустарыгар тарганарын, кыттыы элбиирин ситиһэргэ былаанна ылынабыт.